IPANINDUGAN ANG PAGKA-DUNGGANON

Nagatuman sa iya ginasaad ang dungganon nga tawo. Wala nagabag-o ang iya pasalig sa mga tawo nga nagbulig sa pagtib-ong agud iya nga mauyatan ang iya ginahandom kag ginadamgo.

Diri nakilala si Governor Arthur Defensor Sr. Siya ang ginahimo nga halimbawa nga may pinasahi nga liderato agud nga maguyod ang probinsya sa kahimtangan nga ginapasidunggan, ginakilala kag ginadayaw sang tanan.

Madamo sang nagadayaw kag nagatangla sa gobernador, ilabi sa mga yadtong nagabenepisyo sa iya liderato, sa mga yadtong yara sa iya nga nasakupan kag sa mga nakaagom sang iya nga kaalwan.

Mabudlay puison, mabudlay ligwaton kag mabudlay nga guyuron sa tuhay nga panan-awan ang mga tawo nga nag-ayuhan paagi sa pagbenepisyo sa kaalwan sang gobernador.

Subong nga Disyembre 25, nagasaulog sang iya kaadlawan ang gobernador sang probinsya sang Iloilo. Nagabaha ang mga panamyaw kag ang pagdayaw sa iya kag ang iban ginapaagi sa personal nga pagpalaab-ot sang mensahe ukon paagi sa social media.

Kabay nga mangin legasiya man sini, magluwas sa pisikal nga proyekto nga iya ginahimakasan nga matapos sa ugsaran sang kapitolyo, ang pagtuman sa iya ginpasalig sadto sa iya mga kaupdanan sa pulitika, sa iya mga ginpasaligan santu sa ila kasugtanan.

Nagapati ang gobernador nga ang pulitika indi palanublion kag bangud nga nalab-ot na sini ang tanan nga kadalag-an kag kadungganan, angay nga itugyan na sini ang renda sang pagdumala sa iban nga may ikasangkol kaangay sa iya.

Linghod pa ang iya anak, indi pa sampaton sa pagdumala sa probinsya. Posible nga napilitan lang nga magdalagan bangud indi sini luyag nga paslawon ang iya amay nga nagahandom nga ang ila apelyido ang sa gihapon amo ang magadumala sa kapitolyo.

Tuhay ang sitwasyon sang napilitan lang kag sa may daku nga handom nga magserbisyo.

Halos tanan nga kaalyado sadto sang gobernador ang nagpahigad na.Nakapoy na sang paayon sa iya nga luyag nga siya lang ang husto kag siya lang ang nagadominar. Nangin instrumento lang para sa iya nga kadalag-an ang iya mga kaupdanan nga iya ginadalukan sang higayon nga sila man ang iya itib-ong.

Sa sini nga paskwa kag sa kaadlawan sang gobernador, kuntani indi na niya pagdalukan ang pumuluyo sa probinsya nga makapili sang kaangay niya nga may pag-ulikid, may pagpalangga, kag nagahandom sa kauswagan sang probinsya.

Ipadayon ang kadalag-an sang probinsya paagi sa bag-o nga panan-awan, mas may ikasangkol, mas hangkilan sa pagserbisyo, kag may mas daku nga handom agud mapatayuyon ang kauswagan sang probinsya sang Iloilo. Ini ang ginatan-ay nga sahi sang pagserbisyo nga luyag himuon ni Dr. Ferj Biron, ang kongresman sang Cuarto distrito sang Iloilo.

Malawig na ang pagserbisyo sang mga Defensor sa kapitolyo, nakita na sang tanan ang ila ikasarang.

Ang pagbag-o sang panahon indi mapunggan. Sa tagsa ka pagkapuklid sang gabok nga puno sang kahoy, may magatuhaw nga tuhay nga kahoy sa iya luyo nga amo ang mas magatalbo, magatindog sang mas mapag-on kag mangin mas mabinungahon.

Magapabilin nga dungganon ang probinsya sang Iloilo kon ipabilin man sang gobernador ang iya pagkadungganon paagi sa pagtuman sa iya mga pasalig kag sa mga pulong nga iya nabungat.

Brought to you by:
'Bag-o nga Partylist sa Iloilo,
Ang Kabuhayan Partylist'

#iloilonews
#AngKabuhayanPartylist
#AngKabuhayanPartylistIloilo