COA, NAGPANUGYAN SA KAPITOLYO

Naandan na nga, sa idalom sang administrasyon ni Governor Arthur Defensor Sr.,  ang bulig para sa sports activities nga ginapangunahan sang DepEd ang gina-release paagi sa fund transfer nga nasakpan sang Memorandum of Agreement ukon MOA.

Apang sa 2017 Annual Audit Report, ginrekomendar sang COA sa Iloilo provincial government nga untaton ang fund transfers sa DepEd-Iloilo para sa paghiwat sang sports activities bangud sa mga iregularidad sa disbursement kag liquidation sang bulig nga ginahatag sang kapitolyo.

Imbis nga himuon ang naandan nga cash transfer, ginpanugyan sang COA nga dapat maghanda ang kapitolyo sang tuigan nga financial plan para sa mga sports-related activities nga regular nga ginahiwat sa kada tuig.

Ginrekomendar mismo sang COA ang masunod nga istratehiya sa kapitolyo nga ginadumala ni Defensor:

- planuhan ang mga tuigan nga sports activities nga ginapondohan

- magdihon sang mga istratehiya agud nga ang tanan nga procurement sang sports supplies kag equipment ang matigayon sa husto nga tion; kag

- hatagan sang mga allowance ang mga yadtong angay lamang nga wala nagadoble sa kantidad nga ginahatag sang ila tagsa ka buluthuan ukon sang iban nga mga LGU.

Nagsabat man ang provincial government nga nagapasiguro nga magapasad ini sang mga istratehiya tuhoy sa husto nga tion nga pagbakal sang sports supplies kag materials kag maghatag sang mga allowance sa players kag coaches.

Nalakip sa mga ginsambit nga istratehiya amo ang paghiwat sang orientation/briefing sa mga DepEd personnel, i-require sila nga magsumiter sang lista sang kinahanglanon nga mga sports supplies kag materials sang mas temprano, kag obligaron nga magpreparar sang Work and Financial Plan nga nagaunod sang detalyado nga mga aktibidades kag timeline nga may commitment nga tumanon.

Nahibaluan nga naghingyo si Gilbert Solidum, ang tagpamuno sang School and Operations Divisions sang DepEd-Iloilo, sang 20.379 million pesos agud igasto sa 382 ka mga atleta kag 120 ka mga coach, assistant coach, chaperons, kag trainers para sa WVRAA 2019.

Sang nagligad nga tuig, naghingyo si Solidum sang Php 16,928,994.00 para sa 390 ka mga atleta.

Wala sang dapat iwangal si Board Member Lorenz Defensor angot sa punto nga indi mapondohan sang provincial government ang para sa sports-related activities sang DepEd-Iloilo bangud kahibalo siya nga may mahimo sila sang iya amay agud nga matuman ang ila katungdanan para sa mga atleta.

Kahibalo man si Governor Defensor nga dapat gintuman niya ang panugyan sang COA, wala siya nagpabaya, nangin masinulundon siya kuntani agud nga wala sang problema nga magaabot kaangay sini.

Indi angay nga ibasol sa iban ang mga sayop kag kakulangan kon mismo ang natungdan ang wala nagtuman sa iya katungdanan.

Kon pahambalon mo daw malimpyo kag wala nagakapalta sa iya katungdanan apang ngaa sagunson ang pagmuno sang COA sa mga kakulangan, sa mga angay nga himuon, kag sa mga dapat niya nga tumanon.

Kuntani untatan na ang pagpatalang sa mga isyu, atubangon kag sabton ang mga palamangkutanon kag indi na pag-ipaagi sa kutaw-kutaw nga istorya nga ang mga nagabalabag sa pagpasar sa pondo amo ang magapasakop sa palumba sang dalagan.

Dapat pamatud-an ang katampad kag tuod-tuuron ang pagkahayag.

#iloilonews