NAKAMARASMAS NA ANG MGA ILONGGO

Gabok na ang duyan nga ginapatulugan sa mga Ilonggo. Malawig na nga panahon ini nga nagtunton. Madugay man ang ila mahamuok nga pagtulog bangud sila ang ginkantahan sang mga pampatulog nga ambahanon.

Apang sa karon, mabatian na ang pagragritnit sang gabok nga duyan. Amat-amat nga nagamadmad ang mga tawo, nagabangon gikan sa ila mahamuok nga katulugon kag ind na magpamati sa pampatulog nga ambahanon.

Dapat nga islan na sang mabakod nga higot kag dapat bag-o na ang duyan agud nga mangin kampante ang mga Ilonggo sa ila katulugon, kalmante kag wala sang ginakabalak-an.

Maathag man nga sa lima lang gid ka bulan, ang ginabugal nga mataas kag talakladon nga resulta sang survey nga paborable sa kay Congressman Toto Defensor, ang amat-amat nga napanas.

Kaangay ini sang mataas nga tumpok sang balas nga nagatapan sa tagsa ka pagtaklas, gina-anod sang mamunog nga ulan, ginapalid sang makusog nga hangin nga sang mamulungan wala na sang may nagatumpok kag wala na sang may mahakop.

photo: from the web

Sa resulta sang pinakaulihi nga preference survey sang Random Access Consultants, Inc. ukon RACI sadtong Disyembre 8 tubtub 14, 2018, nagapatimaan nga si Congressman Ferj Biron nakakwa sang 47.2 percent batok sa 51.5 percent sang iya kasumpong para sa pagka-gobernador para sa sini nga eleksyon.

Kon pinsaron, lima ang pabor kay Biron, lima man ang pabor kay Defensor sa sini nga survey nga nagasakop sa 1,200 ka mga respondent gikan sa 120 ka barangay nga nalapta sa lima ka distrito sa probinsya sang Iloilo. Ang mga respondent naga-edad sang 18-anyos pasaka kag lunsay mga rehistrado nga botante sang probinsya sang Iloilo.

Nag-umpisa sa takladon nga resulta sang survey ang porsyento nga nakwa ni Biron batok sa iya kasumpong, apang sa amat-amat kag tayuyon nga paghimakas, kag nakita sang tawo ang sensiridad ni Biron sa pagserbisyo, siya ang nahamut-an kag siya ang mas ginapili sang mga Ilonggo.

Bisan ano pa ka rimis sang sabaw kon sa iya pagbugnaw imo na lang liwat nga gin-init, ang iya sabaw ang indi na manamit.

Ang tanan nga bagay nga segunda lang sa nauna ang indi makatupong sa kalidad, kabus sa abilidad, kag kwestyunable ang integridad.

Nakamarasmas na ang mga Ilonggo nga tuhay ang amay sa bata. Nakamuklat na ang mga Ilonggo nga dapat tilawan naman ang bag-o nga abilidad, kalidad kag integridad sang nagadumala sa kapitolyo.

Indi lipod sa tanan ang kapisan, ang kahugod, ang kasensiro kag wala untat nga pagserbisyo ni Congressman Ferj Biron.

Tion na nga mabutang sa mapa ang probinsya sang Iloilo nga may madamo nga pasilidad kag istruktura nga makabulig sa ekonomiya sang probinsya. Dapat matindog na ang mga malapad kag dalagku nga pantalan. Dapat may yara na sang mas madasig pa nga sahi sang transportasyon gikan sa syudad padulong sa mga distrito sang probinsya.

Dapat itugyan sang mga Ilonggo ang probinsya sang Iloilo sa mas eksperyensyado sa pagdumala, mas masangkad ang ihibalo sa mga bagay nga makapatin-ad sa probinsya, sa mas nagatulok sa maayo nga palaabuton sang mga Ilonggo.

Nakamarasmas na ang mga Ilonggo nga ang bata indi makatupong sa ikasangkol sang amay.

Si Congressman Ferj Biron lang ang may ikasarang sa paggiya sa probinsya padulong sa kauswagan.