SIN-O ANG NAGABINUTIG PAAGI SA PAGPAMAHOG?

Kaangay sang gabok nga semento nga ginpalhitan lang sang tuman ka damol nga kalburo, ini ang nangin mabakod kag nangin matinlo sa panan-awan sang mga nagalantaw.

Likom sa ihibalo sang mga tawo, nga wala ginsugiran kon ano ang kamatuuran sa likod sang pagpalhit sang kalburo, daku ang ila pagpati sa nagalitanya nga para sa ila maalam kag masaligan apang sila gali ang ginalimbungan.

Kaangay sa isyu nga ginaistoryahan sa karon, ang tuhoy sa 4^th tranche sang salary increase sang mga empleyado sang gobyerno sa sini nga tuig, madamo na sang argumento nga nagtuhaw kag madamo na sang istorya nga nagapanibit ang nakapamenyar sa balatyagon.

Naglanog ang panindugan ni Governor Arthur Defensor Sr nga indi mahimo mapatuman ang retroactive nga pagpasaka sang sweldo bangud nga maathag kuno sa Local Government Code sa Section 325, paragraph g, nga wala sang retroactive nga matabu.

Bilang gun-an sa pulitika, nangin isa sa mga mataas nga opisyal sang pungsod, lagting nga abogado, matanda sa kasuguan, maalam, kag ginapamatian ang tagsa ka tikab sang iya baba sa kon ano nga mga tinaga ang magakawas kag mangin salandigan sang panan-awan kag direksyon sang mga nagapati sa iya.

Matigdas ang iya pahayag nga opinyon lang ang masarangan sang Department of Budget and Management 6 kag dapat magpangibabaw ang Local Government Code of 1991 kaysa sa ginasandigan nga argumento sang sini.

Matuod, kon wala ka nagapaminsar kag dayon mo tulon sa pahayag sang gobernador, makabig mo siya nga maalam kag wala ka niya ginapatalang sa imo panindugan.

Apang kon ikaw ang nagapangita sang kamatuuran, apisar nga mabudlay kag ikaw ang ginatamay, imo ini maagom kag sa iya dala nga kasanag gilayon nga mapukan ang kadulom.

Mismo si Budget Secretary Benjamin Diokno na ang nagsiling nga ipatuman sang DBM, paagi sa retroactive, ang fourth tranche sang wage hike sa idalom sang Salary Standardization Law ukon SSL sa tion nga ang 2019 General Appropriations Act ang mapirmahan kag ginalauman ini sa una nga semana sang Pebrero.

Kon kaangay sini ang nagakatabu sa national government, ngaa indi mahangpan sang local government ilabi na sa Iloilo provincial government nga ginadumalahan ni Defensor?

Sin-o ang kabus sang kaalam? Sin-o ang nagaulianon na? Sin-o ang dapat magtuon liwat sang kasuguan agud nga magpreska ang pang-ino-ino kag makasambit sang matuod nga pahayag nga wala sang simbog sang pagpatalang.

Sa nasiling na, kon ang bulag magguyod sa bulag sila ang mahulog sa pil-as. Kon sundon mo ang pahayag sang gobernador kag indi ka magbasa agud makamuklat ang imo mata sa kamatuuran, ikaw ang iya maguyuran padulong sa madalom nga tugalbong sang kabutigan.

May paaman nga pamahog ang iya pahayag nga kon wala ka nagabasa daw magaseparar ang imo kalag sa kaugalingon mo nga lawas.

Karon nga gina-ayag ang kamatuuran, nagaseparar ang bato sang ka-tonto sa balas sang ka-ungas. Kag makita kag mahangpan na sang tanan nga ginagamit lamang nga argumento sa pulitika ang 4^th tranche sang salary increase kag ginapasibangud sa iban ang ila kapaltahan.

Sadto sa panahon ni Kristo, naghugas man sang iya kamot sa atubang sang tawo si Poncio Pilato.