Nagapamati ang mga ulihing tubo sa giya nga ginahatag sang mga nauna sa ila sa duyan. Puno sila sang inagyan ukon eksperyensya sa kabuhi rason nga mas may integridad sila nga pamatian kag sundon sa kon ano ang ila mapanugyan sa mga nagasunod sa ila.
Ang mga ulihing tubo ang nagatuman kag nagasunod bisan pa nga may mga palangkutanon nga nagatublag sa ila paminsaron apang padayon ang ila pagtikang sa banas nga gintudlo sa ila.
Ginasiling sa sosyolohiya nga ang mga tawo sa sosyodad ang nagasandig kag nagatuman sa mas may otoridad sa ila, sa mas tigulang sa ila, sa mas may eksperyensya, kag sa mas sampaton nga tinuga.
photo: The Daily Guardian
Bangud sini, katungdanan sang mga tigulang, sang mga nauna sa duyan, sa mga ginakabig nga gung-an kag hangkilan nga giyahan ang mga ulihing-tubo, dapiton sila sa banas nga dapat nila usuyon kag ipaathag sa ila kon ngaa ini ang mas angay nga banas nga pagasubayon labaw sa iban nga mga banas.
Dapat indi magdinalok ang tigulang sa paghatag sang iya kinaalam sa mga kabataan. Dapat mangin sulundon siya sang tanan nga nagapati sa iya kag nagasandig sa iya kinaiya. Dapat indi niya pagpatalangon ang mga nagasalig sa iya.
Kon magbutig ang dapat magsugid sang matuod, ano ang madangatan sang mga tawo nga sa iya nagasunod? Indi ayhan sila magtalang sa banas sang pagpakuno-kuno? Indi ayhan sila mahulog sa pil-as sang kabutigan? Indi ayhan sila malimbungan sang maalwan nga nawong? Indi ayhan sila mahulog sa tugalbong sang reporma kag pagbag-o?
photo: The Daily Guardian
Nagpaathag na si Director IV Mae Chua ang officer-in-charge sang Department of Budget and Management 6 paagi sa iya sulat nga napetsahan Disyembre 10, 2018 para kay Vice Governor Christine Garin nga nagasiling nga ang retroactive application sa pagpatuman sang 4th Tranche sang compensation adjustment, santu sa Executive Order No. 201, series of 2016, sang LGU sa idalom sang annual budget ang ginatugutan.
Daku ang obligasyon sang abogado nga nagapanghimanwa nga magpasanag sa mga nagalindo-lindo nga paminsaron sang mga empleyado agud nga sila ang mapahamtang kag indi mangin mabug-at ang ila tagsa ka pagtikang.
Naghumok na ang panindugan ni Governor Arthur Defensor Sr. sa pagsiling nga bukas siya sa tuyo sang Sangguniang Panlalawigan nga usisaon ang iya ginproponer nga badyet para sa probinsya.
Kuntani sadto pa lang ginhimo na ina sang gobernador bangud kahibalo man siya nga obligasyon sang Sangguniang Panlalawigan nga busision ang kaundan sang iya ginaduso nga pondo para sa interes sang hayag nga panggobyerno.
Kuntani sadto pa lang nangin mahumok na siya kag wala na nagpakatig-a nga hatagan sang ligwa ang mga board member nga tumanon ang ila katungdanan sa idalom sang kasuguan.
Kon wala lang nagpakati-g ang gobernador, kuntani subong wala na sang problema ang badyet, kuntani napasar na sang mas temprano kag kuntani wala na sang tuhay nga pinsaron nga nagalindo-lindo nga mga empleyado.
Apang sa nasiling ko na, kag sa una ko na nga nabalhag nga sinulatan sadtong Disyembre 11, 2018, nga may tig-ulo ‘saka sa sweldo, wala sang kabalak-an’, kag mabasa sa sini nga link: https://iloilonewsandevents.blogspot.com/2018/12/saka-sa-sweldo-wala-sang-kabalak-an.html, aton na napaathag nga matigayon gid ang ginapaabot nga saka sa sweldo.
Dapat tandaan, mas makatalagam ang pagbinutig sang tawo nga imo na nga ginasaligan.
Comments
Post a Comment