KON SIN-O ANG NAGAPANGTAP-ING, SIYA ANG NAGA-UYAT SANG BULING

Sa tagsa ka mag-abot ang panahon sang kampanya, ang masami nga gina-akusar sang kasumpong amo nga nagapamakal sang boto si Dok Ferj Biron. Makabig ini nga isa ka halusinasyon ukon dalamguhanon nga malayo sa realidad nga akusasyon sang nagahabil-habil nga kasumpong.

Mismo si Police Senior Superintendent Marlon Tayaba ang Iloilo Police Provincial Office director ang nagsiling nga wala sila sang may namonitor nga ‘vote-buying incidence’ sa probinsya sang Iloilo. (Palihog tsekyar sa sini nga link: http://www.pna.gov.ph/articles/1061030 )

Maathag nga sadto pa man, wala sang may nagakatabu nga vote-buying kag ang nagaakusar luyag lamang nga magmusing sa kadungganan kag integridad sang iya kasumpong. Maathag pa gid nga butigon ang nagapasibangud sa kay Dok Ferj Biron.

Karon, sin-o ang mas nagapamentaha sa kaban sang gobyerno? Sin-o ang nagapahamot sang iya ngalan gamit ang resources sang gobyerno?

Nasarangan gani nila nga tunlon ang hilikuton nga wala sang gasto ang ila bulsa bangud nagasakay sila sa ngalan sang ‘serbisyo publiko.’

Ginayaguta pa nila ang nagagasto gikan sa iya kaugalingon nga pinabalhasan. Naghimakas, nag-ukod, ginlab-ot ang damgo kag nangin madinalag-on nga milyunaryo.

Pareho lang man sila nga nagasugid nga lunsay mga anak sang pigado. Nagtuon, naghandom kag naghimakas nga makatibawas.

Gikan sa kapital nga 35 mil pesos nga gin-invest sang iya amay sa iya nga negosyo nga magamay nga botika nga ginapa-igo lang sa 20 metros kwadrado nga espasyo sa syudad sang Iloilo, iya ini nga napamuad, napadamo kag napalapta tubtub nga naglipas ang 28 ka tuig kag siya ang nagmadinalag-on kag ang gamay nga kwarta nangin pila na ka milyon.

Nakapasad siya sang Philippine Pharmawealth Inc., nagapatindog sang walo ka ospital sa bug-os nga pungsod kag ang pinakauna sa syudad sang Iloilo amo ang nagahingapos nga matapos kag mangin operational sa sini nga bulan nga 8-storey building nga may helipad. (Palihog tsekyar sa sini nga link: https://www.philstar.com/opinion/2018/08/02/1838817/dealers-hope )

Mabasol mo bala si Dok Ferj Biron kon siya ang nagmanggaranon? Ngaa mahikaw ka sa iya nga kaalwan? Ngaa bantayan mo ang iya ginapanghatag nga bulig gikan sa iya bulsa kay indi man ini gikan sa kaban sang banwa?

Maathag nga ang nagapasibangud dapat hatagan sang pagtamod. Diin kamo nagakwa sang inyo ginagasto? Masami kamo nagasiling nga wala kamo sang kwarta kag indi kamo kaangay kay Dok Ferj Biron nga dagaya sa grasya, apang likom kamo kon magpanghatag sang kwarta. Diin ina nagikan?

Gina-uyatan ninyo sa liog ang mikropono agud nga ang inyo tingog nga libagon amo lang ang mabatian sang tawo. Pilit ninyo nga ginatrapuhan ang inyo tap-ingon nga guya gamit ang matinlo nga ngalan sang iban.

Nagapatinlo-tinlo kag nagapaalam-alam, ginabansagan ang kaugalingon nga dalayawon kag sulundon, apang ang tanan nga alukaba ginaluak sang panahon.

Nagasungaw ang baho nga madugay na nga ginatago. Ang ila pagpakuno-kuno ang natuipan na sang mga tawo.

Maathag na para sa tanan nga 'kon sin-o ang nagapangtap-ing, siya ang naga-uyat sang buling.'

Nakamarasmas na ang mga Ilonggo. Kinahanglan na nga bulngon ang balatian sa kapitolyo nga gintuga sang nagapakilala nga maalam nga abogado.

Kinahanglan sang kapitolyo ang doktor agud aton madaug ang puturo sang Iloilo. Kinahanglan naton si Dok Ferj Biron, siya lang ang may ikasangkol nga madumalahan ang probinsya paagi sa liderato nga may hinambalan, patas kag makatarungan.

#iloilonews