GOVERNOR ARTHUR DEFENSOR SR., NAKURYENTE

May hurubaton nga nagasiling, 'kon ang bulag guyuron sang bulag sa tugalbong sila magahaplaag.'

Madamo sang nagatangla kay Governor Arthur Defensor Sr. nga isa ka maalam nga abogado, nagabungat nga may punto, kag wala nagabinutig ukon nagapatalang sa tawo.

Ginakilala siya bilang isa ka tawo nga masaligan, masandigan kag wala nagahandom nga magtinonto ukon magpanghalit sa iya isig-kapareho.

Apang, ang tanan nga bagay sa kalibutan mga umalagi, nagabaylo, nagalubad kag nagatukal sa alukaba ukon panit pag-abot sang husto nga panahon.

Ginaduso ang tawo nga magkapyot sa patalom kon ini ang nagakaguot na. Nagabag-o ang iya panan-awan sa kabuhi, nagaligwat ang iya panimuot kag nagahakus sa bagay nga malaot apisar nga nakahibalo siya nga indi maayo ang madulot sa iya.

             (Left) Iloilo Gov. Arthur Defensor Sr. & (Right) Mayor Geefre Alonsabe   (photo: The Daily Guardian)

Kaangay ini sa natabu sining ulihi lang nga wala gid nagpangusisa si Governor Defensor sa kamatuoran kon bala nakabungat si Congressman Ferj Biron sang mga pulong batok sa iya.

Nagapati kita nga mas madamo siya sang tagsakdag kag madamo sang tawo nga mahimo niya mapamangkutan kon bala matuod ang nagalapta nga balita agud iya masiguro kon nabungat gid man ni Dok Ferj Biron.

Apang, nagpasaga-saga siya sa paghatag sang gilayon nga pahayag nga wala nagpanagadsad. Naglumpat siya sa bubon nga wala gintungkad kon ano kadalom. Ang iya kaalam ginsulod niya sa bulsa sang mga nagapangabuhi sa paglibod sang mga sugilanon.

Makaluluoy ang gobernador bangud indi siya kahibalo magpangayo sang pasaylo sa iya mga nabungat nga pahayag. Makaluluoy siya bangud sa mata sang nakatukib sang kamatuoran mahimo nga siya ang bansagan nga nagabinutig.

Hinali nga daw gintakluban ang gobernador bangud sa malapad nga kamatuoran nga naglikop sa iya alipudwan. Nagpangisog si Banaag Octaviano Almira ang presidente sang Senior Citizen Federated Association of Iloilo Inc. - Alimodian Chapter sa paggwa kag nagpahayag nga sadtong Oktubre 12, 2018 pa nagpatawag sang sinapol si Dok Ferj Biron kag natapos ang programa nga wala ini sang may nasambit nga tinaga batok sa gobernador.

Gin-athag pa sini nga wala sang may natabu nga sinapol sa sini nga tuig sa tunga nila kag ni Dok Ferj Biron.

Nagpanindugan man si Alimodian Mayor Calay Alonsabe nga wala sang kaangay sini nga hitabu nga nagluntad sa ila banwa kag naluoy siya sa ila banwa nga nangin sentro sang patalang nga impormasyon.

Kon wala sang may nagapangisog sa pagtindog sa kamatuoran, magapangibabaw ang mga manugpatalang. Makaluluoy ang banwa kag ang probinsya kon ang nagadumala maoy sa poder kag masarangan nga butigan ang iya nasakupan agud lamang nga indi siya makabiya sa iya palangakuan.

Kon laya na ang bunga, nagakuyos na ang panit sang liso, nagatukal, nagakatangtang kag nagakadunot sa duta.

Mangin leksyon ini sa gobernador nga indi magpati gilayon sa sugilanon. Dapat niya nga tungkaron ang kamatuoran kag indi gilayon maghatag sang reaksyon sa mga tinaga nga nagaduyan-duyan sa iya, nga pabor sa iya, kag nagadayaw sa iya, bangud ini ang makatiliplang nga mangin tunaan sang iya pagkahulog sa tugalbong sang kabutigan.

Matuod gid nga wala sang dapat kakulbaan ang nagahimo sang husto kag matarong bangud mismo ang kamatuoran amo ang magapangapin sa iya.

Agud nga indi makasalapay, likawan ang magwaras ukon magpulok.

#iloilonews