SAKRIPISYO KAG SERBISYO

Dapat alagaran sang isa ka lider ang iya mga nasakupan. Nangin lider siya bangud ginasandig sang iya mga pumuluyo sa iya kaalam, sa iya kaalwan, kag sa iya integridad ang pagdesisyon kag paghimo sang mga bagay nga makapaayo sa ila nga komunidad.

Nagapangita ang mga pumuluyo sang lider nga makabulig sa ila, naga-ulikid sa ila, kag nagahandom kon paano mapaayo ang ila kahimtangan kag mabatak sila sa kapigaduhon.

Napagkit na ini sa paminsaron sang mga pumuluyo bangud man sa doktrina sang Katolisismo nga dapat ang lider amo ang mag-alagad kag indi pag-alagaran. Ginhimo nga palaanggiran diri ang mga pahayag ni Hesu Kristo nga nagkari siya sa kalibutan agud nga mag-alagad kag indi pag-alagaran. Gintan-ay niya ang iya kaugalingon para sa tanan, ginhalad niya bilang sakripisyo kag gintuman ang kagustuhan sang iya Amay nga labing-gamhanan.

Bangud sini, makita na naton ang sahi sang mga pulitiko nga yari sa aton luyo. Makilala mo sila paagi sa ila mga akto bisan pa nga malumanay ang ila mga tingog, nagapaluoy-luoy kag mabuot pamatian apang ang ila mga akto ang mas makasugid sa ila nga pagbinatasan.

May mga kandidato nga ginagamit ang kaban sang gobyerno agud nga ibulig sa tawo, dira sila nagasandig sa pagpakita sang ila kaalwan kag maayo nga pagdumala. Ginapahamot nila ang ila ngalan gamit ang kaban sang banwa kag ginapatudok ang kabalaslan sa tawo nga nagabaton sang bulig gikan sa ila.

May mga kandidato man nga wala nagasandig sa kaban sang banwa bangud may kaugalingon sila nga kwarta gikan sa ila ginhimakasan. Nagdaku sa kapigaduhon, nagbakas kag naghandom tubtub nga nagmadinalag-on kag nakatipon sang manggad nga ila man karon ginabulig sa mga kubos. Nahangpan nila ang kabudlay nga ginaabaga sang mga pigado, naagyan nila ang banas nga gina-usoy sang mga pigado, kag nabatyagan nila ang katugnaw sang gab-i nga wala sang ginahapin kontra sa tugnaw.

Mas nagakadapat nga pilion sang mga botante ang ini nga sahi sang mga kandidato nga nagmadinalag-on sa pagsumpong sa kapigaduhon kaysa sa mga kandidato nga nagdaku sa malum-ok nga hiligdaan, naghulat sa manggad sang iya ginikanan kag wala sang ikasarang sa pagdesisyon para sa iya mismo nga kaugalingon.

Mas nagakadapat nga pilion sang mga botante ang mga kandidato nga nagabatyag sang ila ginaagunto, makahangop sa ila sitwasyon kag nakapangabuhi sang ila kabuhi.

Tion na nga magbugtaw kag magmuklat sa kamatuoran ang mga botante sa probinsya sang Iloilo.

Hatagi ninyo sang higayon nga mapapag-on ang salandigan sang inyo palaabuton. Indi na kamo magpadala-dala sa apelyido sang kandidato nga kabus ang ikasarang kag wala sang may napamatud-an.

Kon nahimo ni Dok Ferj Biron nga mabatak ang iya kaugalingon sa kapigaduhon, mahimo man niya nga mabatak sa kapigaduhon ang probinsya sang Iloilo.

Angkon ni Dok Ferj Biron ang masanag kag masangkad nga panan-awan kon paano mahatagan sang mapag-on nga puturo ang probinsya sang Iloilo.

Ginahikawan ang iya kaalwan sang iya mga kasumpong sa pulitika apang ang ila kahikaw nagabalik sa ila kag mas nagapatukal sa ila alukaba nga karon natukiban na sang pumuluyo ang ila malain nga mga ginapanghimo.

Si Dok Ferj Biron lang ang nagasakripisyo agud nga makahatag sang tampad kag maalwan nga serbisyo agud nga dag-on ang puturo sang Iloilo.

#iloilonews