Naurungan ang tanan sa ila nga nakita. Halos indi makapati sa kainit sing suporta nga ginpakita sang mga pumuluyo sang banwa sang Maasin para kay Dok Ferj Biron.
Isa na ka maragtas ang Abril 28, 2019 nga magapabilin sa pang-ino-ino kag balatyagon sang mga pumuluyo ang ila pagpakigbahin sa Maasin Municipal Grand Rally.
Maasin, Iloilo
NGAA MAKATILINGALA?
Wala ginalauman nga mismo sa teritoryo sang kasumpong sa Tercer Distrito tuman ka daku sang suporta nga ginhatag nila kay Dok Ferj Biron.
Maasin, Iloilo
ANO ANG MGA PATIMAAN?
Ginakabig sang mga eksperto nga nagkambyo na ang panimuot sang mga tawo. Mas nakilala nila si Dok Ferj Biron. Mas nahibaluan nila ang matuod batok sa mga akusasyon, pagmusing, pagyubit kag paglaragway sa iya sang iya mga kasumpong sa pulitika. Mas nabatyagan nila ang kasinsero sini sa pagbulig sa tawo. Mas naapresyar sang pumuluyo ang pag-ulikid ni Dok Ferj Biron sa ila kahimtangan. Mas nakita nila ang masanag sini nga panan-awan sa kon paano batakon ang Iloilo sa puraot nga kahimtangan.
Maasin, Iloilo
NGAA SI DOK FERJ BIRON ANG ILA NAHAMUT-AN?
Nakita nila ang kinaaiya ni Dok Ferj Biron bilang isa ka matuod nga lider. Nakita nila ang paghimakas ni Dok Ferj Biron nga makaserbisyo sa ila nga wala nagasandig sa iya amay. Nagtutom, nagpangabudlay, naghandom, nakatibawas kag nagabulig sa mga kubos, ini ang ila pagkilala kay Dok Ferj Biron. Ila ginahimo nga inspirasyon kag nangin salandigan sa paglab-ot sang ila masanag nga palaabuton.
Oton, Iloilo
NGAA MALAS-AY ANG ILA APRESASYON SA KASUMPONG?
Nabatyagan sang mga pumuluyo sa Iloilo nga naglipas na ang pagdumala sang amay nga Defensor kag tuhay ang kinaiya sang iya bata. Nakahibalo sila nga ang kadalag-an sang bata sadto, bisan wala nagakampanya, ang nasandig sa impluwensya sang iya amay. Nakita nila nga indi angayan, wala sang ikasangkol, kag kulang sa sensiridad si Toto Defensor sa pagpanghimanwa, kag indi nagakadapat nga magsunod sa iya amay sa kapitolyo. Mas ginapili sang tawo si Dok Ferj Biron nga ila mangin masunod nga gobernador.
BLACK PROPAGANDA KAG FAKE NEWS
Ginalauman na sang pumuluyo sa probinsya sang Iloilo ang wala untat nga black propaganda kag fake news. Kaangay sang natabu sadtong Abril 28, 2019 sa banwa sang Barotac Nuevo, Iloilo nga madasig nila nga gin-angot ang ngalan ni Dok Ferj Biron sa isa ka persona nga kuno nagbitbit sang pusil kag nag-harass sa ila. Luyag nila ipinta nga mapintas kag poderoso si Dok Ferj Biron nga ang matuod sila ang mapintas kag hubog sa poder, mahilig mag-imbento sang sugilanon kag luyag nga tiplangon ang pumuluyo.
Napamatud-an na sang probinsya sang Iloilo ang ila kabutigon. Madumduman nga mismo si Governor Arthur Defensor Sr. ang nagpalapta sang sugilanon nga kuno natabu sa banwa sang Alimdian kag kuno nagbungat sang pahayag si Dok Ferj Biron batok sa iya nga ginsupak kag ginpanginwala naman sang mga natungdan, ilabi na ni Mayor Calay Alonsabe kag sang tagpamuno sang mga senior citizen. Maathag nga desperado na sadto pa ang mga Defensor kag nabatyagan na nila ang ila kalutusan.
Sta. Barbara, Iloilo
BAG-ONG PAGLAUM
Masanag ang pagbutlak sang adlaw sa nasidlangan. Nagabantala sang masanag nga palaabuton kag bag-o nga liderato sa kapitolyo. Nagapabor ang panahon, ang higayon, kag ang pumuluyo sa kandidatura ni Dok Ferj Biron nga mangin masunod nga gobernador sa probinsya sang Iloilo.
Maathag ang mensahe ni Dok Ferj Biron kag nahangpan ini sang mga pumuluyo rason nga ila gina-updan agud nga dag-on ang puturo sang Iloilo.
Ang kadalag-an ni Dok Ferj Biron mangin kadalag-an sang probinsya sang Iloilo.
#iloilonews
Comments
Post a Comment