May katapusan ang tanan nga bagay, maayo man ukon malain. Bisan ano pa ka singkal sang init, nagapaiway ini agud nga abi-abihon ang pagbulos sang bulan nga magahatag sing mabugnaw nga pamatyag sa tanan, magapakita sing maanyag nga dagway sang langit, kag magapabugal ang inggat sang mga bitoon.
Ang tanan may kahigayunan, ang tanan ginahatagan sang tion. Kag sa paglipas sang panahon, may mga bag-o nga magatuhaw ukon maga-usbong.
Tion na nga aton abi-abihon ang bag-o nga liderato sa kapitolyo. Liderato nga may masanag nga panan-awan. Liderato nga nagahandom sang kauswagan para sa tanan. Liderato nga patas kag wala sang mantsa sang kurapsyon.
Agud nga mabalanse naton ang serbisyo sa kapitolyo kag mautod na ang paghari sang iban nga tawo, dapat pasudlon na naton ang liderato nga magahatag sang masanag nga puturo para sa Iloilo.
Kabahin ka sa mga nagsakdag kay Dok Ferj Biron Kabahin ka sa mga nagtib-ong para sa masanag nga palaabuton. Kabahin ka sa mga nagahandom nga mahatagan sing maayo nga puturo ang Iloilo.
Nahangpan ni Dok Ferj Biron ang imo panindugan. Ginarespeto ni Dok Ferj Biron ang imo desisyon. Kahibalo siya nga magatahaw man ang kainit sang eleksyon, kag pagpuas sang tanan, handa siya nga magbaton sa imo kahimtangan, luyag ka niya nga makaupod sa pagpasad sang mapag-on nga puturo sang Iloilo.
Ang tanan nga bato nga matig-a, nagahumok sa nagaynay nga ilig sang tubig. Kahibalo si Dok Ferj Biron nga magakambyo ang imo desisyon kag sa Mayo 13 nga eleksyon handa ka nga hatagan si Dok Ferj Biron sang higayon agud nga imo mangin gobernador.
Maathag ang resulta sang pinakaulihi nga survey nga ginpatigayon sang Philippine Survey and Research Center nga magapanguna si Dok Ferj Biron labaw sa iya mahuyang nga kasumpong.
Sa tagsa ka distrito, halos nadominar ni Dok Ferj Biron ang resulta sang survey nga ginhiwat sadtong Pebrero 16 tubtub Pebrero 21, 2019, paagi sa face to face interview sa 500 ka rehistrado nga mga botante sa probinsya sang Iloilo.
Nagpangibabaw si Dok Ferj Biron sa primer distrito nga may 66%; sa segundo distrito nga may 44%; sa tercer distrito nga may 25%; sa cuarto distrito nga may 73%; kag sa quinto distrito nga may 55%.
Maathag nga apat sa lima ka distrito nagapanguna si Dok Ferj Biron kag sa pangkabug-san may yara siya sang 52% samtang ang kasumpong yara lang sa 38%.
Madamo sang pumuluyo sa kaumhan ang nagaalipasa nga mahilway na sa malawig nga pagdumala sang mga Defensor nga wala nagabalikid sa ila. Luyag sang mga pumuluyo sa probinsya sang Iloilo nga hatagan sang higayon si Dok Ferj Biron agud matilawan ang sahi sang iya liderato.
Wala nagapati ang pumuluyo sang Iloilo sa mga akusasyon sang kasumpong ni Dok Ferj Biron bangud mas nakilala nila ini sang nagpadulong siya sa ila doog.
Nagapati ang mga pumuluyo sang Iloilo nga numero uno nga manugpatiplang, manuglubid sang sugilanon kag manugpatalang ang kasumpong ni Dok Ferj Biron.
Ginadalian sang mga botante sa probinsya sang Iloilo nga mag-abot na ang Mayo 13 agud nga maislan na nila ang nagapakuno-kuno nga matinlo kag pigado nga nagadumala sa kapitolyo.
Sa Mayo 13, magakambyo na ang liderato sa kapitolyo.
#iloilonews
Comments
Post a Comment