'NO DISCONNECTION' SA MGA KUNTADOR, IPATUMAN SA MGA MAY PROBLEMA SA BILLING PERIOD NGA MAYO KAG HUNYO

Nangin madinalag-on ang ginhiwat nga committee hearing sang Committee on Transportation, Communication and Public Utlities sang Sangguniang Panlalawigan sa pagpamuno ni Board Member Monsik Sullano.

Sa interview sang Sanggunian In Action program, ginpahayag sini nga nagtambong ang tatlo ka mga tiglawas gikan sa ILECO 1, 2 kag 3 kag nahisayran nga may yara sang estimated billing nga ginpatuman sa mga bulan sang Marso tubtub Abril bangud sadtong Pebrero ang last reading nga natigayon sang mga electric cooperatives kag namutikan sang mga konsumidor ang hinali nga pagsaka sang ila balayran sadtong mga bulan sang Mayo tubtub Hunyo.

Board Member Ramon 'Monsik' Sullano

Ginsiling sini nga may reklamo sang hinali nga pagsaka sa electric bill kag ina bangud nagtingob ang ila balayran apang pwede sila maka-avail sang staggered payment sa sulod sang duha ka bulan nga mahimo bayaran sa CWD ukon consumer welfare desk sa kada collection office sang ILECO kag ipatuman ang 'no disconnection' sa mga kuntador nga nasakop sang sini nga poblema.

Gindugang sini nga nagpahibalo ang mga ILECO sa kada local government unit kag nagpangayo sang permiso tuhoy sa ila plano nga estimated billing para sa mga konsumidor kag ang kada konsumidor nga nagareklamo tuhoy sa ila balayran ang mahimo magpadulong sa tagsa ka collection office sang mga electric cooperative.