INDI MALAIN ANG MAG-INOM, ANG MALAIN KON MAGTUGA SANG GAMO UKON MAG-ABUSAR
- BOARD MEMBER JUNE MONDEJAR
Nadumduman ni 2nd District Board Member June Mondejar nga may mga insidente nga nagluntad tungod sang hinubog, may mga nabasahan kag nabatian siya nga insidente nga may natiruhan, nabuan-an, kag may rambolanay tungod sang drunkenness.
May tion nga nakapadulong siya sa Bucari, Leon bangud may 'table-table' didto kag pagkalipas sang 30 minutos nga nakabiya siya sa lugar, didto kag may nagluntad nga rambol, naglinupad ang mga bangko kag botilya sa sulod sang plaza tungod sang drunkenness.
Sadtong bag-o pa lamang siya nga nangin alkalde sa banwa sang New Lucena, may hubog nga pulis nga nagsulod sa plaza samtang may ginahiwat nga binayle, ginsaway sang tanod commander apang indi magpasaway, gintiro niya ang tanod commander kag napatay, ang pulis kilala nga palahubog.
Bangud sini, naganyat siya kag nangin motibasyon sa iya nga magpasad sang ordinansa. Aprubado na ang Provincial Ordinance No. 2021-263 may tigulo "An Ordinance Preventing Habitual Drunkenness in Public Places in a Manner That is Disturbing, Threatening or Dangerous Providing Penalties for Violation Thereof and for Other Purposes".
Katuyuan sang ordinansa nga matapna ang 'habitual drunkenness in public places' kag ang mga krimen nga mahimo nga matuga sini kaangay sang tiniruhay, binun-anay, rambolanay nga kon kaisa nagaresulta man sang kamatayon, physical injuries ukon damage to property.
May yara sang duha ka prohibited acts sa ordinansa, una amo ang 'habitually drunk individual in a public place' nga nagadisturbo, nagapamanahog, ukon peligroso sa iban ukon sa iya kaugalingon. Kon may hubog sa tindahan ukon sa plaza nga nagawaras na nga kon pabay-an basi mabun-an ukon matiruhan ukon siya makabuno ukon makatiro, isa na ini ka paglapas sa ordinansa. Kag ang isa pa, amo ang pagserbe ukon pagbaligya sang alcoholic drinks sa mga habitually drunk individual nga nagaakto na nga nagapamahog, nagadisturbo ukon peligroso na sa iban nga tawo ukon mismo sa iya kaugalingon.
Ang penalidad sang ordinansa amo ang mga masunod: 1st violation - Php 2,000.00 kag/ukon pagkapriso sang lima ka adlaw ukon pareho depende sa diskrisyon sang korte; 2nd violation - Php 3,500.00 kag/ukon pagkapriso sang pito ka adlaw ukon pareho depende sa diskrisyon sang korte; kag ang 3rd and succeedding violation - Php 5,000.00 kag/ukon pagkapriso sang 10 ka adlaw ukon pareho depende sa diskrisyon sang korte.
Gin-athag sini nga ang pagpakahulugan ukon depinisyon sang ordinansa sa terminolohiya nga 'habitually drunk individal' nga napatuhoy sa persona nga liwat nga hubog matapos napaandaman sang nagtikma sa iya nga nabalhag sa barangay hall ukon sa police station nga yara naman liwat sa estado sang pagkahubog.
Nasaad sa Local Government Code nga ang Sangguniang Panlalawigan may yara gid sang poder sa paghimo sang ordinansa sa pagtapna sang habitual drunkenness sa pampubliko nga lugar.
May yara na sang basehan, ilabi na sa mga nabukid nga barangay, nga mangin mapag-on na ang ila sulok-sulok sang mga barangay officials bangud ang implementing entity sa sini nga ordinansa amo ang mga barangay officials.
Ginsiling sini nga may mga barangay sa nabukid nga bahin nga tuman na ka layo kag indi gilayon mapadulungan sang kapulisan, nga kon kaisa kulang sila sa personnel, ilabi na kon may okasyon ukon programa ukon binayle, ang mga barangay officials na lamang ang nagamentinar sang kalinong kag katawhay kag sa pagpasar sang sini nga ordinansa may balasehan na sila kon ano ila himuon kon may hubog nga nagawaras.
Ginpabutyag sini nga wala sang problema ang pag-inom basta wala lang sang pag-abusar. Magpabilin na lang sa puluy-an kon indi makontrol ang pag-inom, basi madisgrasya ukon makadisgrasya pa gani didto na lang sa ila balay waswas sa pag-inom.
Ginpanugyan man sini sa mga barangay official kag kapulisan nga tungod may ordinansa na, kag kon may nagalapas, indi na maghulat pa nga may matabu nga malain ilabi na kon indi mahatagan sang igtalupangod ang hubog.
via Sanggunian In Action
#iloilonews
Comments
Post a Comment