LIKAWAN ANG AKSIDENTE SA DALAN, MGA SAPAT DAPAT NGA BANTAYAN

Nabasahan ni 2nd District Board Member June Mondejar sa lokal nga pamantalaan nga may baka nga nabungguan sang motorsiklo, kag sang awto, kag may karbaw nga nabungguan sang motorsiklo kon sa diin patay gid ang angkas nga babaye. 

Sadtong alkalde pa sa banwa sang Bingawan, Iloilo si 3rd District Board Member Matt Palabrica, ang ila ambulansya nakabunggo sa baka sa Pavia, Iloilo nga nagresulta sa pagkawasak sang ambulansya kag pagkapatay sang baka.

Napaminsaran sini nga maghimo sang ordinansa agud nga maobligar ang mga tag-iya ukon mga nagabantay sa sini nga mga sapat nga baka, karbaw, kabayo kag kanding nga bantayan gid sing maayo ang ini nga mga sapat agud indi maglagaw sa karsada kag indi mabungguan sang salakyan ukon motorsiklo.

Katuyuan sini nga matapna ang mga vehicular accident nga imbolbado ang mga salakyan ukon motorsiklo kag ang nasambit nga mga sapat nga sa masami kabangdanan sang kamatayon, physical injuries ukon damage to properties. 

Bangud sa sini nga katuyuan, ginpasad niya ang ordinansa nga gin-aprubahan man sang Sangguniang Panlalawigan ang iya gin-author kag gin-sponsor nga ordinansa nga Provincial Ordinance No. 2021-264 nga may tigulo "An Ordinance Penalizing the Owner or Caretaker of Unattended Cow, Carabao, Horse or Goat That Strayed Into the Public Roads and for Other Purposes."

Ginsiling sini nga ang mga tag-iya ukon tagbantay nga madakpan nga ang ila sapat nga yara sa sulod sang karsada nga wala may nagabakero may penalidad nga:

1st offense - 1,000 pesos nga multa kag/ukon 3 ka adlaw nga pagkapriso, depende sa diskrisyon sang korte;

2nd offense - 2,000 pesos nga multa kag/ukon 5 ka adlaw nga pagkapriso, depende sa diskrisyon sang korte; kag,

3rd and succeeding offense - 3,000 pesos nga multa kag/ukon 7 ka adlaw nga pagkapriso, depende sa diskrisyon sang korte.

Kon ang kanding magsulod sa karsada nga wala sang nagabakero, ang tag-iya ukon bantay may penalidad man nga:

1st offense - 500 pesos nga multa kag/ukon 2 ka adlaw nga pagkapriso, depende sa diskrisyon sang korte;

2nd offense - 1,000 pesos nga multa kag/ukon 3 ka adlaw nga pagkapriso, depende sa diskrisyon sang korte; kag,

3rd and succeeding offense - 2,000 pesos nga multa kag/ukon 5 ka adlaw nga pagkapriso, depende sa diskrisyon sang korte.

Ginapanugyan sini sa mga tag-iya kag tagbantay sang apat ka natumod nga mga sapat nga dapat bantayan sing lubos nga indi makapalapit sa karsada sa kahangawa nga mabungguan sang salakyan kag mapatay ukon mahalitan ukon basi makatuga sang kamatayon ukon kahalitan sa lawas sang mga motorista ukon pagkaguba sang propyedad.

Dapat atipanon sing maayo, indi pagpabay-an ang ila kasapatan agud nga matapna ang vehicular accident.

via Sanggunian In Action

#iloilonews