"LOCAL RICE VIS-A-VIS RISING COST OF FERTILIZERS"

TATLO KA RESOLUTION GIKAN SA PRIVILEGE SPEECH NI BM PALABRICA, GIN-APRUBAHAN SANG 13TH ILOILO SP

Gin-aprubahan unanimously sang mga katapo sang 13th Sangguniang Panlalawigan ng Iloilo sa ginhiwat nga 121st Regular Session ang tatlo ka resolution bilang action points gikan sa privilege speech ni 3rd District Board Member Matt Palabrica nga amo man ang sponsor sang resolution kag co-sponsor ang tanan nga katapo sang 13th Iloilo SP nga nagtambong sa sesyon.

Nahibaluan nga ang privilege speech may tigulo "Local Rice Vis-A-Vis Rising Cost of Fertilizers."

Ginpahayag sini nga nahalitan sang covid-19 ang pungsod kag nagtublag sa ekonomiya, nagdugang pa gid ang halit sang bagyo Odette kag ang maiwat nga pondo ang gamiton naman sa rehabilitation kag re-development sa mga naguba nga imprastruktra kag isuporta sa economic growth.

Nagamahal ang balor sang abono kag halos doble ang presyo sang nakalipas nga tuig, kag ginarason diri ang high importation/logistics cost, foreign exchange rate, kag archipelagic nature nga nagaapekto sa presyo sang abono.

Sang naligad nga tuig, nagabalor sang 980 pesos ang balor sang 50-kilos nga sako apang sang nagligad nga semana nagsaka na sa 2,300 pesos kag sang sini lang wala na sang stock ang 21-0-0 ukon ammonium sulfate kag 25-0-0 ukon ammonium chloride.

Ang inorganic fertilizer diri sa Pilipinas lunsay imported. Kon ang presyo sang abono nagdoble, lauman naton nga ang mga mangunguma magabuhin man sa paggamit nila sini kag mabuhinan man ang ila patubas kag ang pangkabg-usan nga patubas sang mais, palay kag kalamay ang maganubo.

Ginpapati kita sang aton mga mamalidha kag mga tinawo sa Department of Agriculture nga ang massive rice importation kag pag-imponer sang taripa ang makapanubo sa presyo sang bugas para sa mga Filipino nga konsumidor kag makabenepisyo ang mga mangunguma paagi sa paghatag sa ila sang suporta gikan sa nakolekta nga taripa.

Matuod, may tayuyon nga suplay sang bugas sa mga konsumidor kag ang nagapadayon nga distribusyon sang binhi, farm equ ipment kag cash subsidy nga ginaagom sang mga mangunguma.

Ginapakamaayo sang mga rice trader ang mag-import sang maayo nga klase sang bugas bangud ini ang nauyonan sang mga konsumidor kaysa sa sahi sang bugas nga ginapatubas sang mga mangunguma nga bisan dagaya apang indi mabakal sa merkado.

Ginduso sini nga hingyuon si Presidente Rodrigo Duterte kag Agriculture Secretary William Dar nga mag-intervene sa nagasaka nga presyo sang abono; ikaduha, hingyuon ang Department of Agriculture Regional Field Office 6 kag Iloilo Provincial Agriculture Office nga maghiwat sang regular nga pagtuon sa mas nauyunan nga baridad sang bugas sang mga mangunguma kag mga konsumidor; kag ikatatlo, hingyuon ang gobernador nga hatagan sang instruksyon ang Provincial Agriculture Office nga gilayon nga maglunsar sang comprehensive multi-year rice development program para sa probinsya sang Iloilo.

via Sanggunian In Action

#iloilonews