EXPANSION SANG MORE POWER ILOILO, APRUBADO NA SA 2ND READING SANG SENADO

Gin aprubahan na kahapon sang Senado sa Second reading ang House Bill 10306 nga magahatag sang otoridad sa MORE Electric and Power Corporation (MORE Power) nga mag expand sang ila power distribution kag operation sa 15 ka mga kabanwahan kag Passi City sa Probinsya sang Iloilo.

Apang antes sini, nag agi anay sa halos 2 ka oras nga diskusyon ang mga Senador agud mapasiguro nga sa insakto ang tanan nga provisions sang sini nga hagna. Una nga ginpaklaro ni Ilonggo Senator Franklin Drilon sa iya mga kaupdanan kun kinahanglan pa sang MORE Power nga magbalik sa kongreso kun ingkaso nga magbaylo ang tag-iya sini sa pila ka adlaw. Apang suno sa sponsor kag Public Services Committee Chairperson Senator Grace Poe nga kun minority share lang man sang kumpanya ang ginapasa sa iban nga shareholders kag kun ini ang magapabilin sa gihapon sa principal owner kag sa korporasyon nga iya man nga ginapanag-iyahan, indi na kinahanglan pa ang approval sang kongreso kundi dapat lang sila nga pahibaluon.

Ginsuportahan man ini ni Senator Ralph Recto kag Senator Richard Gordon apang ginproponer nila nga dapat isulat gid ini sa franchise agud nga mangin klaro. Gintagaan naman sang punto sa mga pamangkot ni Senator Sherwin Gatchalian ang posible nga mangin epekto sa mga Iloilo Electric Cooperatives sang pagsulod sang MORE Power sa pila ka mga kabanwahan nga ila nga nasakupan. Suno kay Gatchalian nga posible nga magtaas ang electricity rates sa mga kabanwahan nga indi maupod sa expansion sang MORE Power bangud nga mabawasan ang ila nga mga kustomer kung mag-offer ang MORE Power sang mas barato nga kuryente kag mas manami nga serbisyo. Apang suno kay Senator Recto nga competition ang tinutuyo sang pagsulod sang MORE Power kag ang mga konsumidor gihapon ang magabenepisyo sini. Madumduman nga mga konsumidor, local officials kag Congressmen mismo ang nagpanawagan sa MORE Power nga magsulod sa ila nga lugar bangud sa kamahal sang kuryente sang ILECOs kag pigado ang serbisyo. Suno pa kay Senator Recto nga indi dapat mahadlok ang ILECOs sa pagsulod sang MORE Power bangud kun matuod nga manami ang ila nga serbisyo, indi man maghalin sa ila ang mga konsumidor kag magkadto sa MORE Power Iloilo. Gindugang pa ni Recto nga yara sa MORE Power ang mas dako nga hangkat kun paano sila makakuha sang customers kag mabawi ang ginaplano nila nga investment nga magaabot sa 1.5 Billion pesos. Dako suno sa iya ini nga risgo sa bahin sang MORE Power kag sigurado nga himuon nila ang tanan agud mapabarato man nila ang kuryente sa sini nga mga lugar kag kun matabo, magabenepisyo gid dire ang mga konsumidor. Ang mga lugar nga sakop sang ginaduso nga hagna para sa expansion sang MORE Power amo ang kabanwahanan sang Alimodian, Leganes, Leon, New Lucena, Pavia, San Miguel, Santa Barbara Zarraga, Anilao, Banate, Barotac Nuevo, Dingle, Duenas, Dumangas, San Enrique kag ang Passi City. Indi man suno sa iya dapag magkabalaka ang mga konsumidor sa iban nga mga kabanwahan nga indi subong madala sa expansion sang MORE Power bangud pwede man ini dayon maistoryahan sang ILECOs kag MORE Power sa pila ka adlaw kag pwede man sila magsulod sa ginatawag nga Joint Venture Agreement. Nagapati ang mga Senador nga indi ini pagpabay-an sang mga ahensya sang Gobyerno kapareho sang Energy Regulatory Commission, National Electrification Administration, Department of Energy kag Kongreso agud mapasiguro ang kamalayran sang tanan nga mga konsumidor. Ginklaro man nanday Senators Drilon kag Recto nga indi upod sa ginaduso nga expansion ang power to expropriate sa mga assets sang ILECOs bangud may mga franchise pa ini sila. Kun madumduman nga ang power of eminent domain yara sa RA 11212 franchise sang MORE Power kag gingamit ini agud mag expropriate ang mga assets sang anay distribution utility sa Iloilo City nga wala na sang prangkisa nga nauna na nga ginsuportahan sang Korte Suprema. Gintalana sang Senado ang 3rd kag final reading sang sini nga hagna sa masunod nga semana kun sa diin wala na sang argumento nga magakatabo kundi pagabotohan na lang ang pag aprubar sini. Kun matapos ini sa Senado, ginalauman nga maipasa ini sa Malacanang kag mapirmahan ni Presidente Rodrigo Duterte antes ini manaog sa pwesto sa Hunyo 30, 2022.

#iloilonews