Ginhiwat sang nagligad nga Miyerkules, Oktubre 12, 2022, ang committee hearing sang Committee on Infrastructure kag Committee on Transportation, Communication and Public Utilities tuhoy sa kahimtangan sang Ungka Flyover.
Sa radio program nga Sanggunian In Action, ginpahayag ni 2nd District Senior Board Member June Mondejar nga may duha ka katapo sang Sangguniang Panlalawigan ang nagreklamo tuhoy sa epekto sang pagdiperensya sang Ungka flyover nga nagtuga sang traffic jam kag madamo sang pumuluyo ang nagareklamo sa chairman sang Committee on Transportation tungod sang traffic jam sa bahin sang Ungka flyover.
Ginsiling sini nga ang chairman sang Committee on Infrastructure naghiwat sang committee hearing kag ginpamangkot ang tiglawas sang Department of Public Works and Highways Regional Office 6 nga nagsiling nga gina-imbestigar ini karon sang Bureau of Design sang DPWH.
Gindugang sini nga kon ano ang mangin resulta sang imbestigasyon amo man ang mangin basehan sang solusyon kag kon ano nga solusyon ang ila iga-adoptar amo man ang igapatuman.
Sa karon, gintukuran agud indi magpadayon sa pag-usmod. Ginpahayag ni DPWH-6 Assistant Regional Director Al Fruto nga yara na sa 7-8 centimeters ukon kapin sa 3 inches na ang pag-usmod sang tatlo ka poste kag ang iban nga mga poste ang indi man apektado.
Ginpabutyag sini nga bilang isa man ka civil engineer may yara man siya sang kaugalingon nga espekulasyon sa posible nga rason apang mas angay nga hulaton na lamang ang resulta sang imbestigasyon sang Bureau of Design sang DPWH.
Indi angay nga basulon gilayon ang kontraktor ukon ang structural designer tungod padayon pa ang imbestigasyon. Hulaton ang resulta sang imbestigasyon agud mahibaluan kon sa diin kag kon sin-o ang may diperensya.
Importante nga may maduso nga gilayon nga solusyon, mapahibalo ang tawo kon tubtub san-i ipatuman ang solusyon, kag importante nga may nagadumala sa lakat sang trapiko ilabi na ang nagaatubang sa syudad sang Iloilo.
Gintumod sini nga wala sang traffic enforcer ukon nagadireher sa lakat sang trapiko. Ginakahangaw-an sini nga may magluntad nga sag-iranay sang mga salakyan nga magatuga sang malawig nga traffc jam sa sini nga lugar.
Nagalaum si Mondejar nga talupangdon gid anay ang pagdumala sang lakat sang trapiko samtang ginapangitaan sang solusyon ang problema sa Ungka flyover agud mangin safe ang nagalabay kag mga motorista.
via Sanggunian In Action
#iloilonews
Comments
Post a Comment