Magahiwat sang joint committee hearing ang Committee on Infrastructure, bilang lead committee, nga ginapamunuan ni 4th Distriict Board Member Rolando Distura kag Committee on Transportation, Communication and Public Utilities nga ginapamunuan ni Ex-Officio Board Member Ramon Sullano sang PCL-Iloilo, sa Miyerkules, Oktubre 12, 2022 takna alas 1:30 sang hapon sa Session Hall.
Sa radio program nga Sanggunian In Action, ginpahayag sini nga nakapadala na siya sang imbitasyon sa mga resource persons kaangay sang DPWH, ang kontraktor, ang NEDA, kag ang tanan ginaagda nga magtambong.
Ginsiling sini nga tuyo sang sini nga lihok nga maathagan ang kahimtangan sang proyekto kag makabulig sa pagpahibalo sa mga pumuluyo nga ang temporaryo nga pagpasarado sang Ungka Flyover para sa safety sang pumuluyo.
Gindugang sini nga posible may nakita ang DPWH nga pag-usmod sa 3 ka haligi sa 16 ka mga haligi sang flyover. Ang proyekto wala pa na-turnover sa DPWH. Tuyo hibaluon kon may problema sa desinyo kag kon may problema sa implementasyon sang proyekto.
Ginpabutyag sini nga dapat magbinuligay ang mga ahensya sang gobyerno kag dapat nga may transparency kag accountability nga makita ang pumuluyo.
Ginasigahum sini nga pagkatapos sang committee hearing may solusyon nga makita kag masiguro kon san-o gid pagabuksan liwat.
Nakita sini nga daku nga economic driver ang Ungka flyover ukon makabulig sa pagpatin-ad sa ekonomiya sang Iloilo.
Natublag lang ang pumuluyo bangud nga ginbuksan na apang ginsarado liwat nga nagatuga sang huol sa matag-adlaw nga biyahe sang pumuluyo.
Nahibaluan nga may ginahimo nga pagpabakod sa istruktura paagi sa dugang nga tukod kag may grout injecting ukon cement injecting nga himuon sa 28 metros nga kadalumon sang mga pilote agud nga magpag-on ang pundasyon.
Nagtumar sang akto ang Sangguniang Panlalawigan tungod sa mga reklamo sang pumuluyo kag katungdanan sini nga buligan ang mga pumuluyo nga maathagan tuhoy sa sini nga kabalaka.
Ginpabutyag sini nga ang Provincial Board, kaupod kay Vice Governor Christine "Tingting" Garin kag kay Governor Arthur Defensor, Jr., nagasuporta gid para sa katumanan sang proyekto sa pinakamadali nga panahon.
via Sanggunian In Action
#iloilonews
Comments
Post a Comment