Ginrekomendar sang Joint Committee nga ginalakipan sang Committee on Infrastructure, bilang lead committee, nga ginapamunuan ni 4th District Board Member Rolando Distura kag Committee on Transportation and Communication and Public Utilities nga ginapamunuan ni Ex-Officio Board Member Ramon Sullano, ang Presidente sang PCL-Ioilo, sa 21st Regular Session sang 14th Sangguniang Panlalawigan ng Iloilo nga adoptaron ang ila Joint Committee Report kag aprubahan ang apat ka mga resolution.
Ginalakipan ini sang mga maasunod:
(1) hingyuon ang Bureau of Design sa idalom sang DPWH Central Office nga maghimo sang ideal design nga yara nalakip tanan nga geological circumstances kag personal nga bisitahan kag hibaluon ang tatlo ka iban pa nga mga flyover nga ginatukod agud mapasiguro ang iya integrity kag safety agud matapna ang kaangay nga insidente sa Ungka flyover;
(2) hingyuon ang DPWH Regional Office VI kag International Builders Corporation (IBC) nga mag-hire sang consultant gikan sa Semirara Mining and Power Corporation agud maghatag sang ideya kag rekomendasyon tuhoy sa vertical displacement sang Ungka Flyover kag gamiton ang third equipment para sa jet grouting sang Ungka Flyover;
(3) manduan ang DPWH Regional Office VI nga magsumiter sa Committee on Infrastructure sang Sangguniang Panlalawigan of Iloilo sang findings sang imbestigasyon sang Bureau of Design kag lakip ang rekomendasyon agud matadlong ang diperensya, kag Regular Report tuhoy sa progreso sang proyekto; kag,
(4) hingyuon ang Iloilo City Public Safety and Transportation Management Office (ICPSTMO) kag ang Pavia Traffic Management Office (PTMO) nga regular nga magsapol agud maatipan ang re-routing kag ang pagdumala sang trapiko sa lugar, lakip ang pagpahamtang sang tarpaulins bilang mga warning device.
Una nga nagpaalinton si Board Member Sullano tuhoy sa kahimtangan sang ginatukod nga Ungka Flyover.
Gin-refer ini sa duha ka komitiba durante nga ginahiwat ang 15th Regular Session sang 14th SP nga napetsahan Oktubre 4, 2022 kag gin-indorso sang SP Secretary, Atty. Raul Tiosayco, Jr., 'for study, report, and recommendation'.
Nakabaton si Board Member Sullano sang madamo nga reklamo kag ginkumpirmar ini ni 3rd District Board Member Matt Palabrica nga ang pagpasarado sang flyover nagresulta sa tatlo ka oras nga trapik sa kada adlaw niya nga biyahe.
Samtang, ginpatpat ni DPWH Assistant Regional Director Jose Al Fruto nga may yara 4 ka flyover projects sa probinsya nga amo ang Aganan, Buhang, Hibao-an, kag Ungka. Dululungan ang mga ini nga ginpondohan sang DPWH Regional Office VI. Ginapatuman ang mga proyekto agud nga malikawan ang posible nga paggutok base sa traffic development sang syudad kag probinsya sang Iloilo.
Sa partikular, ang Ungka Flyover isa ka 680-million project nga may three (3) phases. Isa ini ka 728 meters nga kalabaon nga may four-lane elevated way. Bahin sang proyekto amo ang pag-imprubar sang two side access roads, drainage improvement, kag two-kilometer concreting sang asphalt roadway nga gin-usar bilang detour. Inisyal nga ginbuksan ini sadtong Hunyo 30, 2022, nga ginakabig bilang soft opening. Ginbuksan ang two lanes sa publiko.
Sa karon, yara na sa 93% ang overall project accomplishment kag ginaluman nga lubos nga mabuksan sadtong Oktubre apang ginpaiway bangud sa nagapadayon nga proyekto sang Metro Iloilo Water District (MIWD) kag ang imbestigasyon tuhoy sa pag-usmod.
Namutikan ang structural concerns sang gin-obserbahan ang trapiko kabangdanan nga ila gin-umpisahan ang monitoring kag pag-imbestigar sa istruktura.
Sa 16 ka piers nga nagabug-os sa flyover, may tatlo ka piers nga apektado, ilabi na ang piers 4, 5, kag 6. Ang pag-usmod ginasiling nga minimal kag indi makita sang mga mata. Kapin ini sa 3mm, 1mm, 4mm, kag kon kaisa Omm. Kapin 10 ka adlaw ang inisyal nga obserbasyon nabuyagyag nga ang pag-usmod nagapadayon kabangdanan nga ila gindesisyuna nga temporaryo nga isarado ini sadtong Septiembre 18, 2022 bangud indi nila makompromiso ang safety sang kada isa bisan ano ini ka minimal nga isyu.
Ginpahayag ni ARD Fruto nga kon magpadayon ang pag-usmod ini mangin significant structural concern. Apang, komitido sila, luyag, kag handa nga maghimo snag corrective measures. Ang IBC nga contractor nagpahayag man sang ila commitment and kag magmuno nga nagapakig-angot sila sa Bureau of Design sa Central Office sang DPWH para sa dugang nga advisory.
Gin-athag ni ARD Fruto nga wala sang isyu sa pagpatuman sang proyekto. Ang tanan nga poste himo sa palareho nga materyales, ginhimo sa palareho nga proseso, palareho nga equipment, kag palareho nga mga tawo. Gina-imbestigaran nila ang tuhoy sa kaso. Nakaumpisa na sila sang shoring agud mag-istable ang tatlo ka poste kag magapadala sila sang mga eksperto. Ang IBC kag DPWH nagalaum nga makwa nila ang final recommendation gikan sa Bureau of Design agud maumpisahan na ang aplikasyon sang permanent engineering intervention.
Gindugan ni ARD Fruto nga wala sila sang datus pa agud makahimo konklusyon nga ang problema yara sa desinyo, gani, nagapangibabaw ang presumption of regularity.
Umpisa sadtong Septiembre 6, 2022, ang vertical displacements may total accumulated measure nga kapin sa 7-8 centimeters.
Indi makadumdom si ARD Fruto kon pila ang actual bid amount sang istruktura sang ginpamangkot siya ni Board Member Palabrica, kag magahatag siya sang report nga igasumiter sa Provincial Board.
Ginkumpirmar man ni ARD Fruto nga ang proyekto sakop pa sang warranty santu sa mga probisyon sang Republic Act 9184 ukon ang "Government Procurement Reform Act", kag sang iya Revised Implementing Rules and Regulations.
via Sanggunian In Action
#iloilonews
Comments
Post a Comment