Skip to main content

MADASIG NGA PAG-AKTO AGUD MASOLBAR ANG PROBLEMA SA UNGKA FLYOVER, GINPAN...


Nanindugan para sa mga apektado nga pumuluyo si 4th District Board Member Rolando Distura paagi sa iya privilege speech sa ginhiwat nga 22nd Regular Session sang 14th Sangguniang Panlalawigan ng Iloilo nga may tigulo "UNREASONABLE DELAY IN THE RE-OPENING OF THE UNGKA FLYOVER".

Nagpahayag siya sang iya disappointment tuhoy sa wala rason nga pagkaatrasar sa liwat nga pagbukas sang Ungka Flyover.

Nalipay ang mga Ilonggo nga may proyekto nga makabulig sa ekonomiya kag palangabuhian kag gin-agwanta bisan nagtuga ini sang huol sa trapiko samtang ginatukod. Ang kinaandan nga oras pagbiyahe ang mas nagdoble, kon indi man nag-triple.

Bangud sa mga reklamo, nagduso ini sa Joint Committee on Infrastructure kag Committee on Transportation, Communication, and Public Utilities nga maghiwat sang Joint Committee Hearing sang tinalikdan nga Oktubre 2022 nga gintambungan sang pila ka importante nga mga personalidad kaangay sang DPWH nga amo ang implementing agency kag ang contractor nga IBC.

Madamo sang punto ang natalakay, ilabi na ang Ungka Flyover isa ka 680-million project nga may three (3) phases. Nagalaba ini sang 728 meters nga may four-lane elevated way. Bahin sang proyekto ang pag-imprubar sa two side access roads, drainage improvement, kag two-kilometer concreting of asphalt roadway nga gina-usar bilang detour. Inisyal ini nga ginbuksan sadtong Hunyo 30, 2022, nga ginkabig bilang iya nga soft opening kag ginbuksan sa publiko ang two lanes. Yara na ini sa 93% overall project accomplishment kag ginlauman nga lubos nga mabuksan sadtong Oktubre 2022, apang napaiway tungod sa imbestigasyon tuhoy sa vertical displacement kag iban pa.

Nabuyagyag nga sa 16 ka piers nga nagabug-os sa flyover, tatlo ka piers ang apektado sang vertical displacement, ilabi na ang piers 4, 5, kag 6. Ang displacements ginasiling nga minimal kag indi matalupangdan sang mga mata. Yara lang ini sa kapin 3mm, lmm, 4mm, kag kon kaisa Omm. Kapin sa 10 ka adlaw nga inisyal nga obserbasyon, nakita nga ang pag-usmod nagpadayon rason nga nagdesisyon ang DPWH nga temporaryo nga saraduhan ini sadtong Septiembre 18, 2022.

Bangud sa pagpasarado, ang trapiko liwat nga nangin daku nga problema sa sina nga lugar. Gintilawan nga tungkaron sa Joint Committee Hearing kon bala ang problema yara sa implementasyon ukon yara sa desinyo. Wala sang categorical nga sabat ang DPWH tuhoy sa desinyo, apang ang lohika nagadikta nga kon gingamit nila ang pareho nga materyales, palareho nga proseso, palareho nga kagamitan, kag palareho nga tawo sa tanan nga poste, demudo may problema sa desinyo. Tungod sini, ginresolbar nga hingyuon ang Bureau of Design sa idalom sang DPWH Central Office nga magpagwa sang angay nga desinyo nga ginkonsiderar ang tanan nga geological circumstances. Agud mapasiguro nga ang liwat nga pagbukas sang proyekto mangin safe para sa tanan.

Angot sini, ginpasiguro ni DPWH-6 Assistant Regional Director Jose Al Fruto ang posible nga liwat nga pagbukas sang Ungka Flyover antes ang paskwa. Ginpromisa pa gid nga mangin malipayon ang paskwa sang mga commuters, travellers kag madamo nga mga Ilonggos nga malawig nga nag-antus sa indi maayo nga epekto sang problema sa Ungka Flyover. Apang, nakabaton siya sang sulat sang damlag lang gikan sa DPWH Regional Office VI nga nagasiling nga indi nila matuman ang ila pasiguro kag indi sila makatalana sang timelines/targets kon san-o liwat mabuksan ang flyover, nga naghatag sang kamatuoran sa hurubaton nga nagasiling "promises are meant to be broken."

Apang indi dapat kuntani amo sini. Indi dapat pagpalawigon ang pag-antus sang pumuluyo sa pagbaton nga ang proyekto maatrasar tubtub san-o bangud sa incompetence sang mga tawo sa likod sini. Dapat ipanawagan kay SEC. MANUEL M. BONOAN, Secretary of DPWH nga manduan sa madali nga panahon, ilabi na si ENGR. EDWIN C. MATANGUIHAN, OIC Director of Bureau of Designs kag iya mga consultants, nga i-review tanan kag aktuhan, maghimo sang permanent engineering solution para sa sini nga proyekto agud nga ang DPWH Regional Office kag ang contractor makaumpisa na sang corrective intervention.

Bilang mga public servants, kinahanglan nga ihatag sa mga Ilonggo ang sinseridad kag dedikasyon nga angay nila nga mabaton. Ang pag-antus kag balakhuon sang mga Ilonggo indi dapat pagpabungol-bungulan kag piyungan sa sini nga sitwasyon. Dapat pasabton ang DPWH, ang Bureau of Designs, kag iya consultants. 

Ginapanawagan man ang mga tiglawas, Hon. Julienne "Jam" L. Baronda sang Iloilo City kag Hon. Michael B. Gorriceta sang Second District nga i-representar ang mga Ilonggo sing maayo paagi sa pagbulig sa pagresolbar sa problema sa Ungka Flyover. Wala sang tion para magkampante kag indi magpasilabot tuhoy sa isyu tungod apektado indi lamang ang imprastruktura kundi lakip man ang transportasyon kag palangabuhian sang mga tawo.
via Sanggunian In Action
#iloilonews

Comments

Post a Comment

Popular posts from this blog

LAWAS SANG KONDUKTOR SANG BUS, NATUNGA KAG NADUNOT MATAPOS LASAKON SANG KOTSE KAG TRAK

Nadalahig sa doble aksidente ang isa ka lalaki nga konduktor sang bus matapos mabungguan sang duha ka salakyan sa General Trias, Cavite. Suno sa report, bag-o lang nanaog sa bus ang biktima kag maga-park kuntani sang hinali na lang ini nga ginbungguan sang salakyan. Bangud sa kadasigon sang insidente, wala na makalikaw ang masunod nga dump truck rason nga nabungguan ang biktima kag naguyod sa highway. Nautod ang hawak kag naibabaw nga bahin sang lawas sang biktima, sa diin ginabulubanta nagalab-ot sa apat ka metros ang distansya sa tunga nila. Samtang, gilayon naman nga nadakpan sang kapulisan ang driver sang salakyan nga una nga nakabunggo sa biktima, samtang padayon naman ang pagpangita sang mga otoridad sa driver sang nasambit nga dump truck. #iloilonews
Post a Comment
Read more

GRADE 3 STUDENT, NA-COMATOSE SA KASTIGO SANG MGA HIGH SCHOOL STUDENTS

 Viral sa social media ang isa ka grade 3 student nga ginpulihan kastigo sang high school students sa Iligan City. Suno sa report, ginabulubanta yara sa apat ka kalalakihan ang nagkastigo sa 9 ka tuig nga bata nga lalaki nga estudyante sang Maria Cristina Falls Elementary School. Makita sa video ang pag-atake sa biktima kon paano nagbayluhanay sang sumbag kag sipa ang mga high school students sa iya lawas. Bangud sini, yara na sa Intensive Care Unit (ICU) ang biktima matapos nga nag-angkon sang nagkalain-lain nga pilas, partikular sa iya ulo. Sa separado nga pahayag, ginkondenar ni Iligan City Mayor Freddie Siao ang mabudlay nga kahimtangan sang biktima kag ginpahayag nga nakahatag na ini sang bulig sa pamilya sang biktima kag sa karon naga-coordinate sa mga otoridad. “I am deeply saddened and disturbed by the tragic incident involving a Grade 3 pupil of Maria Cristina Falls Elementary School, who is now fighting for his life in the ICU after being brutally attacked by a group of h...
Post a Comment
Read more

KONSEHAL NGA ABOGADO, GINLEKTYURAN SANG INHENYERO TUHOY SA IYA TRABAHO SA KONSEHO?

Nagpadala sang sulat si Engr. Roy Pacanan, ang OIC District Engineer sang DPWH-Iloilo City District Engineering Office (ICDEO) sa kay City Councilor Romel Duron bilang sabat sa imbitasyon sang Sangguniang Panlungsod angot sa Resolution no. 2025-735 nga may tigulo "A Resolution Calling for an Investigation in Aid of Legislation before the Iloilo City Council over All Private and Public Works Along Rivers, Creeks and Waterways in the City of Iloilo". Ginpahanumdom sang inhenyero ang abogado nga ang gahum sa pagpangusisa ukon investigation in aid of legislation, nga gintugyansa Senado kag Kongreso sang 1987 Constitution, wala nagasakop sa local legislative bodies.  Kon wala sang pahayag nga nagadumili sa Sanggunian sa pag-imbitar sang resource person para sa legislative hearing, dapat maresolbar anay ang ini nga mga isyu antes ang imbitasyon: Una, ang imbitasyon ukon nasambit nga resolution wala sang may natumod nga proposed ordinance nga nagakinahanglan sang imbestigasyon. Basi...
Post a Comment
Read more