Nag-privilege speech si 2nd District Senior Board Member June Mondejar sa 24th Regular Session sang 14th Sangguniang Panlalawigan ng Iloilo nga may tigulo "IMPLEMENTATION STATUS OF ELCAC PROJECTS".
Ginsiling sini nga sadtong tinalikdan nga Disyembre 2, 2022 nagpadulong siya sa banwa sang Leon, Iloilo kaupod sanday Board Members Rolito Cajilig, Rolando Distura, Domingo Oso, Jr., kag Ramon Sullano agud nga maghiwat sang ocular inspection kag malip-ot nga sinapol sa mga opisyales sang banwa kag mga barangay officials sang Brgy. Talacuan, Leon, Iloilo tuhoy sa progreso sang pagpatuman sang kontrobersyal nga taytay sa Talacuan padulong sa Omambong Provincial Road. Pagkatapos nila nga matalakay ang mga isyu kag kabalaka tuhoy sa kontrobersyal nga taytay, naghingyo ang mga municipal officials nga tsekyaron ang kahimtangan sang implementasyon sang NTF-ELCAC projects.
Suno sa isa sa ila, may mga NTF-ELCAC projects nga ginsuguran apang wala napadayon sang mga kontraktor kag may yara sang mga naatrasar sa pagpatuman lakip ang paghuman.
Ang NTF-ELCAC napatuhoy sa National Task Force to End Local Communist
Armed Conflict. Ginalakipan ini sang Local Government Support Fund-Support to Barangay Development Program (LGSF-SBDP) nga may component sang infrastructure projects, kaangay sang pagpasemento sang mga dalan, pag-upgrade sang farm to market roads, konstruksyon sang potable water supply system, kag pag-imprubar sang barangay health center, electrification sang barangay ukon porsyon sang barangay, street lighting, kag iban pa, sa maligwin kag ilabi na sa mga nabukid nga mga barangay. May component man ini sang non-infrastructure projects nga ginalakipan sang post-harvest facility, kaangay sang rice processing complex nga ginabug-usan sang rice drier, rice mill, hauling vehicle (mini-truck), rice thresher kag iban pa nga farm equipment; sewing machines nga may livelihood facility and amenities; kag small farm reservoir para sa inland fishery program. Ang programa daw gindesinyo agud nga ma-level up ang basic services kag facilities nga gina-enjoy sang pumuluyo sa iban nga mga barangay ilabi na sa mga kaingod sang town proper sa isa ka bahin kag sa pihak pa gid nga bahin sa mga pumuluyo nga yara sa mga malayo nga barangay ilabi na sa nabukid nga mga lugar. Ang mga pumuluyo sa sini nga mga lugar nagalaum sang nagahulag nga social justice.
Naalarma sila sa ginpasuni nga alegasyon nga daw kaangay lang nga ang pagdali-dali nga ginhimo sang Sangguniang Panlalawigan, nga gilayon nga gin-aprubahan ang mga 'urgent requests' sang gobernador para sa otoridad nga makapirma sa kontrata upod sa mga kontraktor para sa implementasyon sang sini nga mga NTF-ELCAC projects, ang wala natupungan sang angay nga pagdali-dali sang mga kontraktor. Ang mga natungdan nga mga kontraktor daw kaangay lang nga wala kahibalo sang kalawigon sang pagpatuman sang proyekto nga kabahin sa ila ginpirmahan nga kontrata kag sang Gobernador nga nagatiglawas sa Probinsya sang Iloilo sa kusog sang otoridad nga ginhatag sa iya sang Sangguniang Panlalawigan.
Ang mga katapo sang Sangguniang Panlalawigan gilayon nga nagahatag sang otoridad sa Gobernador nga makapirma sa mga kontrata agud nga masuguran gilayon ang mga proyekto kag, agud, pagkatapos mahuman gilayon nga mapuslan sang mga pumuluyo nga madugay na nga ginpabay-an sang pila ka mga lideres sang gobyerno nga wala naghatag sang kabalaka sa sitwasyon sa mga maligwin nga mga barangay, ilabi na sa mga nabukid nga mga lugar. Ang mga katapo sang Sangguniang Panlalawigan, gilayon man nga nagakomporme sa hingyo sang Gobernador nga magpirma sa mga kontrata tungod sa nasaad sa sulat sang Gobernador nga ang implementasyon sang proyekto kutob lang sa Disyembre 31, 2022.
Ang mga pamangkot: ano ang matabu kon ang proyekto indi mahuman antes Disyembre 31, 2022? Ano ang matabu sa proyekto nga nasuguran na, apang wala gintapos sang kontraktor? Kon may subsequent tranche, ipadayon bala sang Probinsya sang Iloilo ang pag-avail sang nalakip nga infrastructure projects, kon pila sa mga proyekto nga ginapatuman sa idalom sang existing tranche wala nahuman antes ang Disyembre 31, 2022? May mga proyekto bala nga nagatenir sa procurement stage sa sini nga tion?
Ginapamangkot ini ni Board Member Mondejar bangud nahangpan niya kon ano ka importante sang sini nga mga proyekto sa kalinong kag katawhay nga programa sang gobyerno, ilabi na sa kabuhi sang aton mga kautoran nga nagapangabuhi sa mga maligwin nga nabukid nga mga lugar. Indi mapabuyan-buyanan ang buylo sang sini nga programa nga amat-amat na naghatag sang benepisyo.
Indi nila luyag nga madula ang tumalagsahon nga higayon nga maimprubar ang kahimtangan sang pagpangabuhi sang aton mga kasimanwa sa mga yadtong maligwin nga mga barangay.
Angot sini, gin-refer ini sa Committee on Infrastructure kag Committee on Public Order and Security.
via Sanggunian In Action
#iloilonews
Comments
Post a Comment