MUNICIPAL OFFICIALS SANG LEON, NANGABAY NGA USISAON ANG KAHIMTANGAN SANG...

MUNICIPAL OFFICIALS SANG LEON, NANGABAY NGA USISAON ANG KAHIMTANGAN SANG MGA NTF-ELCAC PROJECTS SA ILA BANWA

Nagpangabay ang mga Municipal Officials sa banwa sang Leon, Iloilo sa mga katapo sang 14th Sangguniang Panlalawigan nga usisaon ang kahimtangan sang mga proyekto sang National Task Forces to End Local Communist Armed Conflict (NTF-ELCAC) sa ila banwa tungod nga may yara sang mga proyekto nga naumpisahan sang kontraktor apang wala na ginbalikan kay may yara sang tuman ka hinay ang implementasyon.

Sa radio program nga Sanggunian In Action, ginpahayag ni 2nd District Senior Board Member June Mondejar nga tungod sa sini nga pangabay nagpalayag siya sang iya privilege speech sa ginhiwat nga 24th Regular Session sang 14th Sangguniang Panlalawigan ng Iloilo nga may tigulo "IMPLEMENTATION STATUS OF ELCAC PROJECTS".

Ginsaysay sini nga sadtong naghiwat sila sang ocular inspection tuhoy sa kontrobersyal nga taytay sa Brgy. Talacuan, Leon, Iloilo nga tuman ka atrasado ang paghuman sini, antes ila magbiya sa lugar, ginpangabay sila sang municipal officials nga talupangdon ang kahimtangan sang iban pa gid nga mga proyekto sa ila banwa.

Katuyuan sang iya privilege speech nga ma-refer ini sa natungdan nga mga komitiba agud nga makapatawag sang committee hearing kag mahibaluan kon may mga NTF-ELCAC projects kag kon matuod nga may delay sa implementasyon sang iban nga mga proyekto.

Nahangpan sini nga bangud panahon sang paskwa, posible nga masaku ang chairman sang committee on infrastructure kag mga katapo sang komitiba.

Ginpabutyag sini nga ila ginpadasigan ang NTF-ELCAC projects nga mapatuman tungod nakahibalo sila nga tuman ang mga ini ka importante kag kapin pa nga ila gilayon ginhatagan sang otoridad ang gobernador nga makapirma sa kontrata upod sa mga kontraktor tungod ginhingyo sini ang gilayon nga pagpatuman sang proyekto agud nga gilayon nga makabenepisyo ang pumuluyo.

Gintumod sini nga ang implementasyon sang NTF-ELCAC projetcs kutob lang sa Deciembre 31, 2022, kag isa sa luyag sini nga ipamangkot kon ipatawag na ang committee hearing kon matuod nga may delay, kon may gin-umpisahan nga wala ginbalikan, kag kon may yara pa nga asta subong wala pa na-bid ukon yara pa sa estado sang procurement ano ang matabu sa proyekto tungod nga ang implementasyon kutob lang sa Deciembre 31, 2022, kag kon ano man ang matabu sa mga proyekto nga mahinay ang implementasyon kag indi matapos antes ang Deciembre 31, 2022.

Luyag man sini hibaluon kon maka-avail pa ang Iloilo Provincial Government sang mga NTF-ELCAC projects kon indi pa matapos ang karon nga ginapatuman nga mga proyekto sa idalom sang karon nga tranche. 

Ginpabutyag sini nga ang katuyuan sang 14th SP amo nga matumod kon may problema, kon paano makabulig sa pagsolbar sa problema kag makapangita sang paagi agud nga mapadasig ang implementasyon sang proyekto.

Nagapati si Board Member Mondejar nga tuman ka nami ang NTF-ELCAC projects, magluwas nga importante sa kadalag-an sa peace and order program sang gobyerno, daku man ang mabulig sini agud maimprubar ang kahimtangan sang pagpangabuhi sang mga pumuluyo sa maligwin nga lugar, ilabi na sa nabukid nga bahin sang mga banwa nga benepisy aryo sang mga proyekto.

via Sanggunian In Action

#iloilonews