14TH SP, GINTUNGKAD ANG PROBLEMA SA WVSGH

 14TH SP, GINTUNGKAD ANG PROBLEMA SA WVSGH

Natungkad na sang Committee on Health and Sanitation sang 14th Sangguniang Panlalawigan ng Iloilo kon ano ang ugat sang problema nga nagaluntad sa Western Visayas Sanitarium and General Hospital.

Ginpahayag ni 4th District Board Member Rolando Distura nga ang malawig nga diskusyon nagdangat sa pagtumod sa kapin duha ka persona nga nagatrabaho sa nasambit nga ospital, partikular na sa bahin sang ila budget kag accounting offices.

Ginsiling sini nga ang natumod nga persona ang may madamo na nga kaso, bisan pa sa panahon sang mga nauna sadto nga mga chief sang ospital. 

Ginpabutyag sini nga, suno kay Dr. Judy Ann Dumayas, ang chief sang ospital ukon ang WVSGH, nga indi matuod nga nagaka-atrasar ang sweldo tungod sa ila bangud nga kon isumiter na ang payroll, may mga higayon nga ginapanas sang ginatumod nga persona ang ngalan nga yara sa payroll nga dapat swelduhan ukon iya ginamato-matuhan.

Bangud sini, nagahimo naman sila sang sub-payroll kag isa lamang ini sa mga madamo nga rason nga naatrasar ang mga sweldo.

REGIONAL HEARING COMMITTEE

Isa sa mangin resolution amo nga hingyuon si Governor Arthur Defensor, Jr. nga mag-isyu sang executive order agud nga pabakuron pa gid ang Regional Hearing Committee nga nasandig sa kasuguan ukon Magna Carta for Public Health Workers. 

Ang Provincial Health Officer amo ang mangin tagpamuno sa sini nga Regional Hearing Committee tungod tungod nahamtang ang ospital sa sakop sang probinsya santu sa Local Government Code. Kaangay ini sadto sa panahon ni Dr. Patricia Grace Trabado nga madamo may disposisyon sang mga kaso.

DISIPLINAHON NI USEC. CAMILO PANCRATIUS CASCOLAN

Nabungat man sa committee hearing nga mismo si DOH Undersecretary Camilo Pancratius Cascolan ang magapanguna agud nga madisiplina ang natungdan nga persona. 

Nabungat niya ini sa sinapol sang mga national officers sa Clark, Pampanga.  

Nagapati si Distura nga naapektuhan ang serbisyo sang ospital tungod sa sini nga persona. Kon siya ang magtugda, luyag sini nga sayluhon sa iban nga pwesto agud nga indi matublag kag problema sa organisasyon kag buslan sang mas kapable kag agud mangin tayuyon ang serbisyo sa pumuluyo.

LUYAG PANGAPINAN SANG SP ANG PUMULUYO

Madumduman nga may problema man sadto sa tresurera sang San Rafael, Iloilo kag ang nasambit nga persona ang yara sa idalom sang national government agency apang ang Sangguniang Panlalawigan ng Iloilo nagtandog sa sini nga isyu agud nga pangapinan ang pumuluyo.

Ginpangunahan man sadto ni 4th District Board Member Rolando Distura ang pagbitbit sang kawsa sang mga pumuluyo nga sa ulihi napamatian man kag nahatagan sang solusyon kag karon matawhay na ang paghulag sang ila local government unit kag indi na atrasado ang sweldo kag nahulag na nila ang ila pondo.

Ginsiling sini nga ang ila ginahiwat nga committee hearing nagatuyo sa paghibalo kon paano sila makabulig sa paghatag sang solusyon sa problema. 

Suno sa iya nga ini ang papel sang Sangguniang Panlalawigan, sa pagpamuno ni Vice Governor Christine "Tingting" Garin, nga magbulig sa pumuluyo, sa pagpangita sang solusyon, kag tungod man nga madamo sa ila ang nangin alkalde man sadto, ang ila esksperyensya sa local government unit bilang local chief executive daku nga bagay nga nakabulig sa ila sa Provincial Board.

via Sanggunian In Action

#iloilonews