KAISOG NI MIA ARGUELLES SA PAG-POST SANG IYA REKLAMO, DAKU NGA BAGAY PARA MASOLBAR ANG PROBLEMA SA WVSGH
Nakumpirmar sa ginhiwat nga committee hearing nga nagaluntad ang atrasado nga paghatag sang sweldo, allowances kag benepisyo sang pila ka empleyado sa Western Visayas Sanitarium and General Hospital.
Tungod sa indi paghangpanay sang mga opisyales sa nasambit nga ospital, nagakaatrasar ang paghatag sang sweldo, allowances kag benepisyo sang pila ka mga empleyado.
Ginpahayag ni 2nd District Senior Board Member June Mondejar nga nagapaminsar siya nga maghiwat sang isa pa ka committee hearing tungod wala pa lubos nga napadalman kon gid ang sitwasyon sa ospital.
Wala nakatambong ang isa ka faction tungod wala nila naimbitar, bisan pa nga nagtambong ang nag-post sang iya reklamo sa social media nga si Mia Arguelles nga anay operating room nurse sang nasambit nga ospital.
Ginsiling ni Arguelles nga ginpahibalo sila tuhoy sa committee hearing, ginpaalinton niya sa mga nagtambong sa rally kag sa isa ka department head apang ginpili nila nga indi magtambong.
Posible nga himuan na lang nila sang committee report, suno kay Mondejar, base sa impormasyon nga ila nabaton kag diri na lang nila iplastar ang ila rekomendasyon.
Ginpabutyag ni Mondejar nga nag-privilege speech siya tungod nga nagakabalaka siya sa isyu sa WVSGH nga posibel maapektuhan ang mga empleyado kag empleyada, kag mga pasyente. Nakumpirmar man nga atrasado ang sweldo kag ini ang nagaapektar sa ia performance kag apektado man ang ginaserbisyuhan nga mga pasyente nga nagasuprer na economically, physically, mentally, gani indi na dapat palalaon pa ang ila pag-antus.
Importante suno sa iya nga matipon ang mga natungdan kag maistoryahan kon ano ang problema kag posible nga solusyon. Mas maayo nga maareglo na sang mas temprano agud indi na magdamo ang maapektuhan. Kadamuan sang mga pasyente gikan sa segundo distrito tungod ang ospital nahamtang sa Santa Barbara, Iloilo.
Bilang board member sang segundo distrito, nagtinguha siya nga maistoryahan ang ini nga bagay agud nga maareglo kag wala na sang may maapektuhan.
Ginpasiguro sang chief of hospital nga si Dr. Judy Ann Dumayas nga indi maapektuhan ang pagserbisyo sa mga pasyente nga nagadangop sa ospital bisan pa nga may yara sang nagaluntad nga indi paghangpanay ukon may paksyon sa sulod sang ospital.
Humalin pa sang 2014 ang problema sa ospital, maka-anum na mag-ilis sang chief of hospital, apang wala sa gihapon naresolbar ang problema.
Dapat ma-reactivate ang Regional Hearing Committee nga ang chairperson amo ang provincial health officer kag amo man ang naga-appoint sa duha ka katapo sini nga ang isa sa ila gikan sa asosasyon sang mga health workers kag ang isa sini amo ang supervisor sang health office. Dapat ma-reactivate ini tungod nga kon may kaso nga makaabot sa sini nga komitiba, ini ang may otoridad sa pagpamati ukon paghiwat sang pormal nga imbestigasyon sa kaso nga makadangat sa sini nga komitiba.
Daku nga bagay nga natigayon ang hearing tungod diri nasanagan kag nasabat kon ano ang ugat sang reklamo sang mga empleyado. Kon mahibaluan ang ugat sang problema, mapangitaan gid ini gilayon sang solusyon.
Ginapasalamatan sini si Mia Arguelles nga maisog nga nag-post sa social media tuhoy sa problema sa ospital.
Nagpasalamat man si Arguelles nga nahatagan siya sang higayon nga makatambong kag naathagan man siya tuhoy sa problema. Tuyo lamang sini sa pag-post sang problema tungod luyag niya nga masolusyunan ilabi na nga indi siya makabatas magpamati kag magtulok sa mga empleyado nga nagareklamo sa masami.
Ginakabig sini nga daku nga instrumento ang reklamo ni Arguelles sa social media agud nga masolbra ang problema sa WVSGH.
(SIA News / Bert Ladera)
#SanggunianInAction
Comments
Post a Comment