BOARD MEMBER JUNE MONDEJAR, GINAKASUBO ANG DUGANG NGA 250 MILLION PESOS ...

BOARD MEMBER JUNE MONDEJAR, GINAKASUBO ANG DUGANG NGA 250 MILLION PESOS PARA MASOLBAR ANG PROBLEMA SANG UNGKA FLYOVER

Ginakasubo ni 2nd District Senior Board Member June Mondejar ang dugang nga 250 million pesos para masolbar ang problema sang Ungka Flyover.

Ginsiling sini nga kon gin-obra sing maayo ukon sing insakto, kuntani nabenepisyuhan na sang pumuluyo ang nasambit nga proyekto. Ginakasubo sini ang dugang nga 250 million pesos tungod magamit pa ini kuntani sa importante nga mga programa, proyekto kag aktibidades sang gobyerno para sa kaayuhan sang pumuluyo.

Ginaproblemahan pa kon sa diin mahalin ang 250 million pesos, kon san-o matigayon nga maagom ang kantidad, kag kon san-o masuguran ang pagsolbar sa problema sang flyover.

Ginpabutyag sini nga mismo siya ang naga-eksperyensya sang kabudlay sa kada adlaw nga paglabay sini sa sina nga lugar kon sa diin nahamtang ang flyover tungod sang naga-igod nga trapiko.

Makaluluoy lang ang mga taxpayers sa natabu sa sini nga proyekto. Posible nga indi pa matigayon subong ang 250 milliion pesos kon wala sang kwaan nga supplemental budget para diri. Posible nga sa masunod nga tuig pa matigayon kon malakip ang kantidad sa igaduso nga badyet sa karon.  

Nagareklamo ang pumuluyo kag masami nga mabatian sa pumuluyo ang pamangkot kon sin-o ang may diperensya, diin ang may diperensya - kontraktor ukon DPWH. 

Kon sa kontraktor ang diperensya, dapat obrahon sang kontraktor. Kon DPWH ang may diperensya, dapat obrahon sang DPWH ukon sang gobyerno kag depende sa ila kon kasuhan ang sin-o man ang may sala.

Usisaon man ang third-party nga naghiwat sang geo-technical investigation nga amo ang ginbasehan sang structural designer sa pagdesinyo sang kadalumon sang bored pile.

Daku nga problema ang nahatag sini nga problema sa probinsya sang Iloilo, ilabi na sa segundo distrito kag tercer distrito, kag sa mga pumuluyo nga nagalabay sa sini nga lugar.

Dapat diskubrehon kon diin ang diperensya, madamo ang nagasuspetsa nga ang kontraktor may diperensya apang indi pa matul-id kon diri sa ila ang problema. 

Kon nasunod sang kontraktor ang plano kag specification, para sa iya wala sala ang kontraktor. Apang kon wala nasunod, may sala ang kontraktor kag may salabton ini.

Kon may sala man ang naghiwat sang geo-technical investigation nga amo ang ginbasehan sang structural designer, dapat may liability man ini.

Kon ang diperensya yara sa DPWH tungod wala ma-supervise sing maayo, dapat sabton sang kon sin-o nga personnel. 

Kinahanglan nga maklaro na agud madula na ang haka-haka ukon espekulasyon kon sin-o ang may diperensya.

Nagalikaw ang DPWH sa pagtumod sa kon sin-o ang may diperensya kag kay-uhon na lang ang diperensya kag gastuhan na lang sang gobyerno. Apang, madamo sang pumuluyo ang nagareklamo sini.

Nadesisyunan sang mga katapo sang 14th SP nga ipatawag paagi sa committee hearing ang mga natungdan kag hatagan sila sang kopya sang resulta sang imbestigasyon sang third-party investigator kag kon ano ang ila rekomendasyon. 

Kon may mga pamangkot sila tuhoy sa resulta sang imbestigasyon, masabat man gilayon kag maklaruhan sila sa resulta kag rekomendasyon agud nga mapaalinton man nila sa mga pumuluyo.

Samtang ginatalupangod ang problema sa Ungka Flyover, dapat pangitaan man sang solusyon agud nga indi mabudlayan ang mga nagalabay sa sini nga lugar.

via Sanggunian In Action / FB

#iloilonews