LPTRP SANG PROBINSYA, GINAHULAT GIKAN SA DEPARTMENT OF TRANSPORTATION

LPTRP SANG PROBINSYA, GINAHULAT GIKAN SA DEPARTMENT OF TRANSPORTATION

Gina-review na kag ginahulat na lang sang probinsya sang Iloilo ang Local Public Transport Route Plan ukon LPTRP gikan sa Department of Transportation.

Ginpahayag ni Ex-Officio Board Member Ramon Sullano, ang PCL-Iloilo Chapter President kag Chairperson sang Committee on Transportation, Communication and Public Utilities nga gamay nga modification ang ginhimo kag nagasantu sa LPTRP sang Iloilo City Government.

Ginalauman sini nga matapos na kag masumiter sa opisina sang gobernador, kag agud nga ma-endorso na sa Sangguniang Panlalawigan, ilabi na sa iya komitibna, agud mapasar na ang ordinansa nga nagasuporta sa LPTRP sang probinsya.

Ginpanikasugan niya sadto, bilang buylog sa hingyo sang mga banwa nga yara sa luyo sang syudad nga makasulod sa syudad sang Iloilo. Malip-ot ang ruta kon indi sila makasulod sa syudad kag mangin wala sang pulos ang ila biyahe nga magaresulta naman sa pagkadula sang palangabuhian sang mga nagabiyahe sang pampubliko nga salakyan.

Ginbaton sang syudad ang proposal sang probinsya, sa pahanugot sang LTFRB kag LTO, kag ginsumiter sa DOTr.

Ginpabutyag sini nga may yara sang developmental route kaangay sang biyahe gikan sa Gaisano - Oton padulong sa Dumangas nga bisan wala pa nalakip sa ruta kag wala pa sang prangkisa apang nagabiyahe na tungod may yara gin-isyu sa ila nga provisional authority.

Ginakonsiderar man ang apektado nga mga traysikol sa maagyan sang ruta kag ginalantaw nga kon mahimo terminal-to-terminal lang sila agud nga indi mahul-an ang mga traysikol sa kada banwa.

via Sanggunian In Action / FB

#iloilonews