DPWH-6, GINAPANGITAAN SANG PAAGI NGA MAGAMIT ANG UNGKA FLYOVER KAG MAPAS...

DPWH-6, GINAPANGITAAN SANG PAAGI NGA MAGAMIT ANG UNGKA FLYOVER KAG MAPASABAT ANG MAY KAPALTAHAN

Nagdesisyon si Regional Director Nerie Bueno sang Department of Public Works and Highways Region VI nga magtambong sa Committee Hearing sang Committee on Infrastructure takna ala 1:00 sang hapon, Biernes, Hunyo 2, 2023 sa Session Hall sang Sangguniang Panlalawigan sa Iloilo Provincial Capitol tungod wala siya iban nga appointment kag natalan nga padulungan, ilabi na nga masami siya nga nagapadulong sa Manila ukon may iban nga appointment.

Ginpahayag ni Bueno nga iya gindesignar si Assistant Regional Director Al Fruto bilang spokesperson tuhoy sa Ungka Flyover tungod nga yara na ini siya sa pag-umpisa pa lang sang proyekto.

Ginpahibalo sini nga sang nagsulod siya bilang regional director, ginbuksan na ang Ungka Flyover kag ang ginasiling  nga displacement ang natukiban na pila ka bulan na antes iya nagsulod sa DPWH-6. 

Ginpabutyag sini nga bisan wala pa sa iya panahon ang pagtuhaw sang problema apang nagapangita siya sang paagi nga masolbar ini. 

Ginsiling sini nga nagkomiter ang third-party consultant nga Adam Abinales Engineering and Consultancy nga magsumiter sang ila report sa katapusan sang bulan sang Mayo apang sa wala mahibaluan nga rason, posible bangud sa bagyo, wala pa nakasumiter apang ang iya kontrata tubtob pa sa Hunyo 30 gani posible nga antes magtakop ang ina nga bulan mahatag na niya ang resulta sang imbestigasyon.

Nahangpan sini ang sentimyento sang mga pumuluyo sa Iloilo nga dapat wala ini natabu apang may mga bagay nga indi malikawan kag wala pa gid mahibaluan kon ano ang kabangdanan sang displacement sa Ungka flyover. 

Nabungat sini nga sa ila sinapol sa NEDA, ginsiling sang third-party consultant nga malum-ok ang duta nga ginatindugan sang Ungka Flyover.

Bisan pa nga nagapangita sila sang solusyon agud magamit ang Ungka Flyover, wala naman nila ginakalimtan kon sin-o ang accountable diri. Mabudlay magtudlo sa kon kay sin-o kon wala sang nagasuporta nga dokumento nga amo gid ang kabangdanan ukon may kapaltahan. 

Ini man ang rason, suno sa iya, nga luyag nila ang full report tuhoy diri. Ang nasaad sa kontrata sang DPWH kag third-party consultant amo lang ang pagtumod sa kabangdanan sang pag-usmod kag kon ano nga interbensyon ang dapat adoptaron.

Ginplastar sang Abinales Engineering and Consultancy ang tatlo ka opsyon para mapun-an ang kakulangan ukon depekto sa flyover apang yara na sa ila central office sa pagpili kon diin sa tatlo ka opsyon ang ila ipatuman. 

Kahibalo siya nga intresado ang tanan kon paano obrahon ang proyekto apang sa karon indi pa sila makahingyo sang dugang nga pondo tungod indi pa sila kahibalo kon pila gid ang eksakto nga kantidad nga dapat hingyuon, ilabi na nga wala pa nakasumiter sang iya report ang consultant.

Natapos na ang funding sang DPWH sa 2023, posible nga malakip na ini sa 2024. Apang, kon matigayon nga masumiter ang report kag mahibaluan kon pila gid ang kantidad nga kinahanglan, tinguhaan sang ila tiglikom nga masal-ot ini sa ila augmentation para sa tuig 2023. Ang augmentation magagikan sa mga proyekto nga indi matigayon ukon mapatuman.

Suno sa consultant nga magalawig sang 10 ka bulan ang intervention nga himuon apang nagapati si Bueno nga mas malawig pa diri tungod masami nga naga-ulan ukon posible wala naisip ang mga adlaw nga indi wala sang trabaho tungod sa pila ka kabangdanan, ilabi na sang panahon.

Ginpabutyag sini nga bisan madamo sila sang ginahimo apang sa pamatyag sang iban daw wala sila sang may ginahimo. Nagsulod siya sa DPWH-6 sadtong Hulyo 2022 kag ginreport lang sa iya ang tuhoy sa Ungka Flyover sadtong Setyembre 6, 2022. 

Sa report sang Project Engineer, ang settlement naoberbahan na sang Setyembre 2021 kag Pebrero 2022 sa magkatuhay nga regional directors apang ginreport lang sa iya matapos ang masobra duha ka bulan. Pagkasunod nga adlaw, gilayon siya nga nagsulod sa ila central office nga asisteran siya tungod nga ang desinyo sang flyover ang ginhimo sang isa man ka consultant kag indi iya sang DPWH.

Suno sa protocol, dapat ibalik nila sa consultant apang binulan sila kag maghulag. Ginsiling sini nga halos duha ka beses sa isa ka bulan siya nga nagasulat kag magluwas sini, personal man siya nga naga-follow-up sa una nga consultant nga nag-obra sang desinyo.

Personal man si Bueno nga nagsugilanon sa tiglikom sang DPWH tungod nahangpan niya ang sentimento sang pumuluyo tungod sa natuga sini nga guot sa trapiko kag ini man ang rason kon ngaa bisan naakig ang pila ka tag-iya sang duta apang ila natigayon nga mapasangkad ang dalan agud nga mahatagan alibyo ang sablag sa pumuluyo.

 

Nagapangabay man si Bueno nga kuntani indi mangin personal ang pag-atubang sa sini nga problema, wala man sila nagatalikod sa sayop kag himuon nila ang tanan nga mahimo. Nagahingyo man siya sang tion agud mahibaluan nila kon sin-o ang may salabton, nga mangin maathag kon sin-o ang medyo nagkulang, mabudlay magbasol sa tawo nga wala man gali sang kasaypanan tungod nga kon may tawo nga imitlang, may pamilya nga apektado.

Indi dapat pagpaminsaron nga may ginatago sila ukon may ginahingabunan. 

Personal niya nga kadtuan sa Manila agud nga makwa ang report kag bisan indi na maghingyo ang Sangguniang Panlalawigan, iya gid nga padal-an sang kopya kon available na ang kopya para mas klaro sa tanan.

via Sanggunian In Action / FB

#iloilonews